DZIPHISALEMA 75 - BIVHILI KHETHWA Mafhungo Madifha

Mudzimu Muṱukufhadzi na Muhulisi

Phisalema, luimbo lwa Asafu lwe a sikela malogwane; i pfi i imbiwe nga kuimbele kwa luimbo lu no ri, “U songo lozwa!”

¹ Ri a u livhuha, Mudzimu, ri a u livhuha! U ima na riṋe! Nga hu ḓivhadzwe zwimangadzo zwe wa ita!

² Mudzimu u ri, “Ndo nanga tshifhinga tsho teaho; ndi Nṋe ane nda haṱula ndi sa ṱaluli.

³ Musi ḽifhasi ḽi tshi dzinginyea na vhathu vhaḽo, ndi Nṋe ane nda tika dziphuphu dza khwaṱha.

⁴ Ndi vhudza vhadzialuswetho nda ri, ‘Ni songo tsha zuwa.’ Vhavhi nda vha vhudza nda ri, ‘Ni songo takusa ṋanga dzaṋu!

⁵ Ni songo imisa ṋanga dzaṋu na lwa na ḽiṱaḓulu; ni songo amba no ṱoṱomodza mutsinga.’ ”

⁶ A no hulisa muthu ha bvi vhubvaḓuvha, ha bvi vhukovhela, ha bvi phangani;

⁷ a no haṱula ndi Mudzimu: u ṱukufhadza muṅwe, muṅwe a mu hulisa.

⁸ Muṋe washu o fara tshinwelo nga tshanḓa; tsho ḓala waini i fhufhumaho mbiti dzawe; u a vha shululela, vhavhi vhoṱhe vha ḽifhasi vha i nwa, vha nwa na tshidziki tshayo.

⁹ A vha nṋe ndi ḓo dzula ndi tshi zwi ḓivhadza; ndi ḓo renda Mudzimu wa Jakopo nga nyimbo.

¹⁰ Vhavhi vhoṱhe u ḓo vha kula ṋanga, vhafulufhedzea vhone u ḓo imisa ṋanga dzavho.