DZIPHISALEMA 74 - BIVHILI KHETHWA Mafhungo Madifha

Lushaka lwa Mudzimu lwo kandeledzwaho Thembele yo phusukanywaho

Tshirendo tsha Asafu.

¹ Mudzimu, wo ri laṱelani? U ḓo sinyutshela riṋe sambi ḽau tshoṱhe naa?

² Elelwa vhathu vhau vhe wa ḓinangela kale-kale, hufha wo vha vhofholola vhupulini uri vha vhe lushaka lwau; elelwa thavha ya Tsioni he wa dzula hone.

³ Edzou tshimbila vhukati ha matumba haya a kale, u vhone uri maswina o thuthekanya hani nnḓu yau khethwa.

⁴ Henefho he ra vha ri tshi ṱangana na Iwe maswina vha vho ṱavha mukosi wa gundo, vha ṱoma fulaga dzavho.

^5-6 Vho pwashekanya zwivhaḓwa zwoṱhe, vha zwi remekanya nga mbaḓo na tsanga, vha tshi nga vha khou haḓa zwiṱaka,

⁷ vha fhisa thembele yau ya tou lore, hune wa luvhiwa vho hu kumadza.

⁸ Mbiluni dzavho vha ri, “Ri ḓo vha lozwa tshoṱhe!” vha fhisekanya hoṱhe he Mudzimu a vha a tshi luvhiwa.

Mudzimu a tsinyaho iṱo

⁹ A ri tsha vhona na tshiga tsha maḓembe; a hu tshee na a no ri ḓivhadza zwine wa funa; a hu na a ḓivhaho uri zwi ḓo fhela lini.

¹⁰ Mudzimu, maswina a ḓo u nyefula u swika lini? Vha ḓo ḓi dzula vha tshi u kolela naa?

¹¹ Khefha u tshi sokou ṱanzwa maṱo wa lavhelesa? U ḓo ri phalala lini wa vha lozwa?

Mudzimu Ramaanḓa tsha kale na kale

¹² Hufha Iwe Mudwimu wo ḓi vha Khosi yanga tsha kale na kale. A si Iwe we wa ri tshidza nga maanḓa au fhano shangoni naa?

¹³ Wo ritha lwanzhe nga maanḓa au, wa devhekanya ṱhoho dza maṋowa a lwanzhe.

¹⁴ Ndi Iwe we wa pwashekanya ṱhoho dza Liviathani, wa ḽi ṋea phukha dza phangani dza ḽa.

¹⁵ Ndi Iwe Muphuli wa zwisima; wo elisa milambo, wa xisa milambo i sa xi.

¹⁶ Vhusiku na masiari ndi zwau; wo tea ḓuvha na ṅwedzi.

¹⁷ Ndi Iwe wo vheaho mikano ya shango, wa ri hu vhe na tshilimo na vhuriha.

U humbudza Mudzimu mulanga

¹⁸ Muṋe washu, u songo hangwa uri maswina a a u nyefula; ndi matsilu, a a u nyadza.

¹⁹ Ḽiivha ḽau u songo ḽi kovhela zwivhanda; vhathu vhau vha khou tambula, u songo vha hangwa tshoṱhe.

²⁰ Elelwa mulanga wau; hoṱhe-hoṱhe vhathu vha sokou levhelana.

²¹ U songo litsha vhakandeledzwa vha tshi shoniswa, vhaheḓana na vhashai nga vha u rende.

²² Mudzimu, vuwa u ḓilwele, u songo hangwa uri matsilu a ṱwa a tshi u nyefula;

²³ mukosi wa maswina au u songo u hangwa, mukosi wa maswina u sa tumuwi!