DZIPHISALEMA 73 - BIVHILI KHETHWA Mafhungo Madifha

Bugu ya vhuraru (Phisalema 73 – 89) Mashudu a vhavhuya ha fheli, a vhavhi ndi a tshifhinganyana Ṱhoho ya mafhungo

Phisalema ya Asafu.

¹ Ngoho Mudzimu u tonda Israele, u thakha vha mbilu dzo ṱambaho.

² Hone nṋe ndo ṱoḓou khukhulwa, kaṱukuṱuku ndo redzemuwa.

³ Ndo vha ndi tshi vhivha vhadzialuswetho, ndi tshi vhona vhavhi zwi tshi vha anḓa.

U ṱonga ha vhavhi

⁴ Vha vhuya vha fa vhá songo pfa vhuṱungu; vho khwaṱha, vho takala,

⁵ a vha tambuli unga vhaṅwe, khombo dzi no wela vhaṅwe, a dzi vha weli.

⁶ Ndi zwine vha ambara luswetho unga vhulungu, u levha vha hu fuka unga nguvho.

⁷ Ludzula lwavho lu beba vhunwa, mbilu dzavho dzi shulula vhukwila.

⁸ Vha goḓa vhaṅwe vha amba mavhi, vha shushedza vhathu nga u vha levhela.

⁹ Na Mudzimu a vha mu teledzi, vha tshi amba a hu na ane vha mu ofha.

¹⁰ Ndi zwine na vhathu vha Mudzimu vha vho vha tevhela, vha kapula zwiambo zwavho zwoṱhe.

¹¹ Vha ri, “Mudzimu a nga si zwi ḓivhe; Waṱaḓuluṱaḓulu a nga vhuya a zwi vhona naa?”

¹² Vhavhi vho tou ralo: ndi vhapfumi, vha ḓi pfuma vha tshi ya.

Vhuyo havho

¹³ Kani-ha nṋe ndi tshi nengwa vhuaḓa, ndi tshi ila vhutshinyi, ho vha hu u sokou ḓinetisa?

¹⁴ Hufha wo ntambudza ḓuvha ḽoṱhe, ḽa tsha wa nthwa.

¹⁵ Arali ndo vha ndo amba zwo raloho, ndo vha ndi tshi ḓo vha ndi tshi khou landula vhathu vha Mudzimu.

¹⁶ Nda edzisa u ṱalukanya maitele a Mudzimu, zwe vhutoto,

¹⁷ nda vhuya nda ya thembeleni. Ha vha hone ndi tshi ṱalukanya vhuyo ha vhavhi:

¹⁸ Iwe u ḓo vha vhea hu redzaho, vha redzemuwa nga vhukwila havho, khunḓa ya fasha muvei.

¹⁹ Iṱo ḽi tshi ri poi, vha vha vho no lovha, vha fhedza nga u godimela hu ofhisaho.

²⁰ Vha nga muloro une ḽi tshi tsha wa fhufha; Iwe Muṋe wa zwoṱhe u tshi vuwa vha a nyamalala.

U rudza mbilu nga u konana na Mudzimu

²¹ Zwiḽa ndi tshi khou ḽa mbilu ndó dinalea,

²² ndo vha ndi tshi nga tshifuwo tshi sa ḓivhi tshithu, ndi tshi nga phukha maṱoni au.

²³ Naho zwo ralo a thi u litshi; u mpfara nga tshauḽa tshanga;

²⁴ u nnyendedza nga nyeletshedzo yau; magumoni u ḓo nṱanganedza vhugalani hau.

²⁵ Wa hanga ngei ṱaḓulu ndi nnyi arali e si Iwe? Na fhano shangoni ndi kha ḓi tamani ndí na Iwe?

²⁶ Naho ṋama na mbilu zwa fhelelwa nga nungo, hone Mudzimu ndi Ene maanḓa a mbilu yanga, ndi Ene mukovhe wanga wa lini na lini.

²⁷ Vha u ṱutshelaho vha ḓo lovha; u lozwa vhoṱhe vha u shandukelaho.

²⁸ A vha nṋe, ndi takadzwa nga u vha tsini ha Mudzimu; Muṋe washu, Muṋe wa zwoṱhe, ndo mu ita vhukhudo hanga; ndi ḓo ḓivhadza zwoṱhe zwine a ita.