DZIPHISALEMA 72 - BIVHILI KHETHWA Mafhungo Madifha

Khosi-khosi Khosi mbuya

Phisalema ya Solomoni.

¹ Mudzimu, funza khosi vhuṱali, a haṱule nga hune wa funa; o bebelwaho vhuhosi mu ṋee maanḓa a khaṱhulo mbuya,

² a kone u haṱula vhathu vhau a sa ṱaluli, vhaheḓana vhau a vha vhuse nga u fulufhedzea.

³ Thavha kha dzi aṋwe lupfumo, mivhundu i bveledze u fulufhedzea.

⁴ Ngavhe a tshi haṱula vhaheḓana a sa ṱaluli, a lamulela vha lilaho, a kandekanya vhakandeledzi vhavho.

Muvhuso u sa gumi

⁵ Nga' lalame unga ḓuvha na ṅwedzi, a vhone mirafho na mirafho.

⁶ A tonde vhathu unga mvula i tshi na pfuloni, a nge vhusuṱo vhu no shasha mavu.

⁷ Ngavhe u fulufhedzea hu tshi anda muvhusoni wawe, ha ḓala mulalo ṅwedzi wa vhuya wa lovha.

⁸ Muvhuso wawe u ḓo ḓadza shango u bva kha lwanzhe u guma nga lwanzhe, u bva Yufuratha u swika mugumoni wa ḽifhasi.

⁹ Tshakha dza phangani dzi ḓo mu khotha, maswina a ḓo tou shuvhama a ṋanzwiswa buse.

¹⁰ Mahosi a Spania na a kule-kule a ḓo ḓisa zwifhiwa, a Sheba na Seba a ḓo ḓisa nduvho.

¹¹ Mahosi oṱhe a ḓo mu khotha, tshakha dzoṱhe dzi ḓo vha vhalanda vhawe.

Khosi ya tshilidzi

¹² Ú lamulela vhaheḓana vhane vha mu vhidzelela, na vhashai vha si na muphalali.

¹³ Vha si na nungo, na vhaheḓana, u vha pfela vhuṱungu; u ḓo tshidza vha lilaho.

¹⁴ Vha tshi kandeledzwa, vha tshi huvhadzwa, u a vha lamulela; u vhona vhutshilo havho vhu ha mutengo muhulu.

Mashudu a si na mugumo

¹⁵ Thovhele nga a lalame! Ngavhe vha tshi mu luvha nga musuku wa Sheba, a dzula a tshi rabelelwa, a humbelelwa mashudu nga misi.

¹⁶ Ngavhe shango ḽi tshi vha na ndalo, thavha dza tou phapha mavhele u swika miṱumbani yadzo, a tou vhofhana unga ḓaka ḽa Libanoni, miḓi ya ḓala vhathu unga hatsi.

¹⁷ Ngavhe dzina ḽa khosi ḽi sa hangwiwi, bvumo ḽawe ḽa nga ḓuvha ḽi sa kovheli; vhathu vha tshi shudufhadzana vha ri, “Mudzimu a u shudufhadze unga a tshi shudufhadza khosi yashu!” tshakha dzoṱhe dza khoḓa mashudu awe.

Thendo (Lupendelo lwa Bugu ya vhuvhili)

¹⁸ Nga hu rendwe Mudzimu Muṋe washu, Ene Mudzimu wa Israele! Ndi Ene e eṱhe ane a ita zwimangadzo.

¹⁹ Nga hu rendwe dzina ḽawe ḽa vhugala lini na lini! Ngavhe vhugala hawe vhu tshi ḓadza shango ḽoṱhe! AMEN! AMEN!

²⁰ Thabelo dza Dafita ṅwana wa Isai dzi fhela henefha.