DZIPHISALEMA 71 - BIVHILI KHETHWA Mafhungo Madifha

Thabelo ya mukalaha: Mudzimu vhukhudo hanga

¹ Muṋe washu, ndi khuda nga Iwe, u songo vhuya wa litsha ndi tshi shoniswa.

² Hufha u tshi fulufhedzea, mphalale u nndamukise! Nthetshelese u ntshidze!

³ Ivha vhukhudo vhune nda dzula ngomu, he wa ri ndi ḓi dzula ndi tshi shavhela hone, ndi tshidzwe; u vhushavhelo hanga, u bako ḽanga.

Mudzimu Mutsireledzi tsha kale na kale

⁴ Mudzimu wanga, nndamukise kha vhavhi, mavemu a tshiṱuhu a si nkunde.

⁵ Muṋe wa zwoṱhe, ndo fulufhela Iwe, fulufhelo ḽanga ndi Iwe u bva hanani hanga.

⁶ Ndo ḓitika nga Iwe tshee nda bebwa, na musi ndi sa athu vhona tshedza, maanḓa anga o vha e Iwe; ndi ḓo dzula ndi tshi u renda.

Mudzimu maanḓa a vha si na maanḓa

⁷ Vhanzhi vho vhona maanḓa au kha nṋe, nge wa vha vhukhudo hanga vhu sa tseki.

⁸ Ḓuvha ḽoṱhe ndi ṱwa ndi tshi u renda, ndi tshi ḓivhadza vhugala hau.

⁹ Ndi songo ri ndo no kalaha wa nṅaledza, u songo nṱutshela zwino ndi si tshee na nungo.

¹⁰ Maswina anga o nndangana, vha ṱoḓa u mmbulaha.

¹¹ Vha ri, “Mudzimu o mu ṱutshela; kha ri mu sale murahu ri mu fare, ha na mulamukisi.”

Mudzimu Muṱulutshelwa

¹² Mudzimu, u songo vha kule na nṋe; Mudzimu wanga, ṱavhanya u mphalale!

¹³ Ngavhe vhane vha nndevhela vha tshi kundwa vha lovha. Vhane vha ṱoḓa u nkhuvhadza ngavhe vha tshi kundwa vha tou niwa nga ṱhoni!

¹⁴ Ndi ḓo dzula ndo u fulufhela, nda u renda nda dovha.

¹⁵ Ndi ḓo bula u fulufhedzea hau. Wo ntshidza lu si na mbalo; ndi ḓo dzula ndi tshi zwi zuwa ḓuvha ḽoṱhe.

¹⁶ Muṋe wa zwoṱhe, Muṋe washu, ndi ḓo renda maanḓa au. Ndi ḓo ḓivhadza u fulufhedzea hau; a no fulufhedzea ndi Iwe u woṱhe.

Mudzimu a fulufhedzeaho

¹⁷ Wo ḓi mpfunza u bva hanani hanga; na zwino ndi kha ḓi bula zwimangadzo zwau.

¹⁸ Mudzimu, u songo nṱutshela nga u vhona zwino ndo kalaha, ṱhoho yo tshena! Maanḓa au a u tshidza vhathu ndi kha ḓi tama u a ḓivhadza mirafho i ḓaho.

¹⁹ Mudzimu, u fulufhedzea hau hu ṋanzwa makole; wo ita zwihulu, Mudzimu, ndi nnyi ane a nga Iwe.

²⁰ Wo nkhwesa khombo nnzhi na dambulo, hone u ḓo dovha wa vusa nungo dzanga, wa nṋula fhasi-fhasi dindini.

²¹ U ḓo nkhudza nda vha muhuluhulu, nda dovha nda rudza mbilu.

Thendo i sa tumuwi

²² Ngoho ndi ḓo u renda nga haripa; Mudzimu wanga, ndi ḓo renda u fulufhedzea hau. Ndi ḓo u imbela nga tshihwana, Iwe Mukhethwa wa Israele.

²³ Ndi ḓo ṱavha mukosi nga dakalo nda u imbela; wo mmbofholola.

²⁴ Ḓuvha ḽoṱhe ndi ḓo dzula ndi tshi bula u fulufhedzea hau, nge vhe vha linga u nkhuvhadza vha kundwa vha tou niwa nga ṱhoni.