DZIPHISALEMA 7 - BIVHILI KHETHWA Mafhungo Madifha

U humbela u bva wo ṱamba khaṱhuloni ya Mudzimu Mutovholwa

Tshililo tsha Dafita a tshi imbela Muṋe washu o hwelelwa nga Khushu wa Mubenyamini.

¹ Muṋe washu Mudzimu wanga, ndi khuda nga Iwe, vha ntovholaho khevha, ntshidze, nndamukise,

² uri vha sa ḓo mponda sa ndau, vha nṱhukhukanya hu si na mulamukisi.

“Thi na mulandu!”

³ Yawee Muṋe washu Mudzimu wanga, arali hu na tshe nda tshinya, zwanḓa zwanga zwó ita tshivhi,

^4-5 arali ndo khakhela a si na nndwa na nṋe, litsha swina ḽanga ḽi nndonde ḽi mpfare, ee, ḽi litshe ḽi ntsikeledzele fhasi, ḽi nkandekanye ndi tsumbudzee mavuni, hu vhe u nnyadzisa tshoṱhe. Hone hezwo a tho ngo zwi ita; hufha na ane a sokou ntswima ndo mu litsha a ṱuwa.

Mudzimu Muhaṱuli a sa ṱaluli

⁶ Muṋe washu, takuwa wo halifha, maswina anga khea o sinyuwa, takuwa u nndamulele! Vuwa u nndamukise!

⁷ Tshivhidzo tsha dzitshakha kha tshi u tange, vhuya u dzule kha khuluṋoni yau nṱha havho ngei ṱaḓulu.

⁸ Muṋe washu u ḓo haṱula dzitshakha. Nṋe nkhaṱhule u tshi tevhedza vhuvhuya hanga, Muṋe washu, vhunga mulandu ndi si na.

⁹ Fhelisa vhuvhi ha vhavhi nandi, vha fulufhedzeaho vhone vha ṱoke midzi, Iwe Mufhenḓi wa mbilu na mihumbulo, Mudzimu a no fulufhedzea.

¹⁰ Ene Mudzimu ndi tshiṱangu tshanga, Mutshidzi wa vha si na vhufhura ndi Ene.

¹¹ Mudzimu ndi Muhaṱuli a sa ṱaluli, mbiti dzawe a dzi dziki misi yoṱhe.

Khaṋo ya vhutshinyi

¹² Arali muvhi a sa rembuluwa Mudzimu u ḓo ṱuṱula banga ḽawe, a akha vhura hawe a dzula o sumba,

¹³ zwihali zwa u vhulaha muvhi zwi dzula zwi tsini, u pfula nga misevhe i dugaho mulilo.

¹⁴ Vhonani muvhi khoyo! U kha vhuṱungu ha u beba vhuvhi! O vhifha muvhilini nga hone vhuvhi, a fhedza nga u beba mazwifhi.

¹⁵ O bwa dindi a ita khunḓa, zwino khunḓa yo fasha muvei.

¹⁶ Vhuvhi hawe vhu ḓo vhuya nṱha ha ṱhoho yawe, u levha hawe hu ḓo mu ḽa ṱhoho.

Thendo

¹⁷ Ndi ḓo renda Muṋe washu ndi tshi itela vhuvhuya hawe. Dzina ḽa Muṋe washu Waṱaḓuluṱaḓulu, ndi ḓo ḽi renda nga nyimbo.