DZIPHISALEMA 69 - BIVHILI KHETHWA Mafhungo Madifha

Mutovholwa o ṅaledzwaho nga vha hawe Mutsikeledzwa-nga-dambudzo

Phisalema ya Dafita ye a sikela malogwane; i pfi i imbiwe nga kuimbelwe kwa luimbo lu no ri “Phendephende”.

¹ Mudzimu, ntshidze, maḓi o guma nga mukulo wanga!

² Ndo mbwandamela dopeni, a hu na vhukando. Ndo wela dzivhani ḽihulu, lutsinga lu ṱoḓou nkumba.

³ Ndo neta nga u ṱavha mukosi, mikulo yanga i ita na u rema; maṱo anga o ita na u punda ndó lindela Mudzimu wanga a tshi nndamulela.

⁴ Vhane vha sokou mmbenga ndi si na tshe nda tshinya, vho anda u fhira mavhudzi anga. Maswina anga a sokou nnzwifhelela; vha na nungo, vha ṱoḓa u mmbulaha. Vha ri ndi vhuedzedze zwe nda si tswe.

Muṅaledzwa

⁵ Mudzimu, Iwe u ḓivha vhuhwarahwara hanga, milandu yanga a i koni u u dzumbama.

⁶ Muṋe wa zwoṱhe, Muṋe washu Ramaanḓaoṱhe, ngavhe vha u fulufhelaho vha sa shoni vha tshi mmbona; Mudzimu wa Israele, vha u luvhaho ngavhe vha sa shoni nga u vhona zwine nda itwa.

⁷ Ndi nyadzelwa Iwe, hezwi ndo ambara ṱhoni.

⁸ Vha hashu vha vho nnyita mutsinda, ndi nga asili muṱani wa hashu.

⁹ Ndo no tou fhelela nga mbilu i tshi swela nnḓu yau, maṱamba ane a poswa kha Iwe a wela kha nṋe.

¹⁰ Ndi ḓiṱukufhadza nga u ḓidzima, ndi zwine vhathu vha nnyadza.

¹¹ Ndi tshi ḓivhuedza nga u ambara saga, ndi tou itwa ṱano.

¹² Mikotoni hu pfala dzina ḽanga fhedzi, zwidakwa zwi ita na u nnyimba.

Mukosi

¹³ Hone a vha nṋe ndi ḓo rabela Iwe Muṋe washu nga tshifhinga tshine wa funa; Mudzimu, u na lufuno luhulu, ipfa thabelo yanga; Iwe u a fulufhedzea, u ḓo ntshidza.

¹⁴ Mphalale, ndi si mbwandamele dopeni, mponyokise kha maswina anga, u nṋule dzivhani!

¹⁵ U songo litsha ndi tshi kumbwa nga lutsinga lwa maḓi, nda milwa nga lwanzhe, nda govhedzwa nga dindi.

¹⁶ Muṋe washu, mphindule; lufuno lwau lu takadza hani! Khathutshelo yau ndi khulu, u songo tsha mpfuralela.

¹⁷ U songo dzumbama mulanda wau; ndi khomboni khulu, ṱavhanya u mphindula!

¹⁸ Iḓa u mmbofholole, nndamulele u fhumudze maswina anga!

Zwifheṱi

¹⁹ Iwe u ḓivha uri ndi nyadziwa hani; ndí fhano ndo bva mvumbo, ndo shona, tendá maswina anga oṱhe á songo u dzumbama.

²⁰ Maṱamba o pwashekanya mbilu yanga, ndo kulea nungo; ndo lavhelela u pfelwa vhuṱungu, zwe ndi bva vhubvo; nda ri ndi ḓo fhumudzwa, zwe vhutoto.

²¹ Ndi tshi pfa nḓala vho mpha vhutulu; ndó farwa nga ḓora vha mpha viniga.

U teketela zwifheṱi

²² Vha tshi ḽa nduvho dzine vha u ṋekedza, nga dzi vhe khunḓa vha wele ngomu; ngavhe madzanga avho a tshi vha tshikwekwe tsha vha fasha!

²³ Nga vha pofule! Miṱoḓo yavho i kulee!

²⁴ Shululela mbiti dzau nṱha havho! Vha sinyutshele u vha lozwe!

²⁵ Miḓi yavho nga i sale e matumba, nḓuni dzavho hu si tsha sala muthu!

²⁶ Vha khokhovhedza o no ḓi rwiwaho; vha tshi vhona mbonzhe dza we wa mu phula, vha a mu holedza.

²⁷ Vhuvhi havho nga vhu lifhedzwe nga vhuvhi! Vha songo vhuya vha ṱamba tsengoni!

²⁸ Madzina avho nga a thuthwe buguni ya vha tshilaho! Kha vha bviswe kha mutevhe wa vhathu vhau vha fulufhedzeaho!

Thendo ya mutovholwa

²⁹ A vha nṋe, ndo kulea nungo, ndi pfa vhuṱungu; Mudzimu, ntakuse u ntsireledze!

³⁰ Ndi ḓo renda Mudzimu nga luimbo, nda livhuha, nda ḓivhadza vhuhulu hawe.

³¹ Hezwo zwi ḓo takadza Muṋe washu u fhira zwiṱhavhelo zwa dzikholomo, u fhira u mu ṋekedza mboho yo vhinaho.

³² Vhakandeledzwa vha ḓo ri u zwi vhona vha takala, vha no luvha Mudzimu vha ḓo ṱuṱuwedzea.

³³ Muṋe washu u thetshelesa vha lilaho, vhathu vhawe vho vhoxwaho ha vha hangwi.

Thendo dza ḽifhasi ḽoṱhe

³⁴ Ḽiṱaḓulu na ḽifhasi, rendani Mudzimu na lwanzhe, na zwoṱhe zwi re khalwo!

³⁵ Mudzimu u ḓo tshidza Tsioni, a vusa miḓi ya Juda; vhathu vhawe vha ḓo dzula hone, shango ḽa vha ḽavho.

³⁶ Ḽi ḓo vha ifa ḽa vhaḓuhulu vha vhalanda vhawe; vhane vha mu funa vha ḓo dzula henefho.