DZIPHISALEMA 68 - BIVHILI KHETHWA Mafhungo Madifha

Mudzimu Murendwa Mudzimu Mubalanganyamaswina

Phisalema ya Dafita, luimbo lwe a sikela malogwane.

¹ Mudzimu u khou vuwa u balanganya maswina, vha mu vhengaho vha shavha vha tshi fhufhura nḓevhe.

² U vha balanganya unga vhutsi; Mudzimu a tou bvelele, vhavhi vha a lovha unga phula i tshi ṋoka muliloni.

³ Vha no fulufhedzea vhone vha a pembela Mudzimu a tshi swika, vha ṱavha mukosi nga dakalo.

⁴ Imbelani Mudzimu, rendani dzina ḽawe nga nyimbo, Munamelamakole, mu lugiseleni nḓila! U pfi Muṋe washu, mu fhululedzeni!

Mudzimu Muvhofhololi

⁵ Mudzimu a no dzula fhethu hawe hukhethwa, ndi Khotsi a tsiwana, Mulwelatshilikadzi.

⁶ Vha si na vhudzulo Mudzimu u vha fhaṱela mahaya, zwivhotshwa a zwi vhofholola, hone mavhanga a ḓo dzula makwarani.

⁷ Mudzimu, zwiḽa u tshi endedza vhathu vhau, u tshi buḓekanya phanga,

⁸ ḽifhasi ḽo dzinginyea, ḽiṱaḓulu ḽa shulula mvula, hu tshi swika Mudzimu wa Sinai, hu tshi ḓa Ene Mudzimu wa Israele.

⁹ Mudzimu, wo nisa mvula nnzhi, shango ḽau ḽo bvaho ḽa dovha ḽa vuwa,

¹⁰ vhathu vhau vha dzula khaḽo, Iwe Mudzimu wa tonda vhaheḓana nga vhuthu hau.

Mudzimu Muladzashango

¹¹ Muṋe wa zwoṱhe o ṋea ndaela, vhasadzi vhanzhi vha mbo ḓi anḓadza ayo mafhungo, vha ri,

¹² “Mahosi a maswina ashu a khou shavha, mmbi dzavho dzo hasekana!” Vhasadzi hayani vha kovhekana zwo thubwaho:

¹³ Zwifanyiso zwa maivha zwo fhomiwaho nga siliva, phapha dzao dzi penya musuku u songo vangiwaho. (Ndi mini vhaṅwe vha tshee vho dzula zwitumbani zwa dzinngu?)

¹⁴ Zwiḽa Ramaanḓaoṱhe a tshi balanganya mahosi Thavhani ya Tsalimoni, o nisa mahaḓa.

Mudzimu Muthubamathubwa

¹⁵ Thavha dza Bashani dzo hula hani, dzi na miṱumba minzhi!

¹⁶ Ni itelani vivho, inwi dzithavha dza miṱumba minzhi? Ni vhivhelani thavha ye Mudzimu a ḓikhethela uri a dzule khayo? Muṋe washu u ḓo ḓi dzula khayo lini na lini!

¹⁷ Muṋe wa zwoṱhe u bva Sinai a tshi ḓa fhethu hawe hukhethwa, e na gariki dzawe dza nndwa dza maanḓa, dza zwigidi na zwigidi.

¹⁸ O thuba mathubwa manzhi, a gonya nao nṱha, a ṋewa nduvho nga vhathu, na mavhanga a mu luvha; Mudzimu Muṋe washu u ḓo dzula henengei.

Mudzimu Mulamuleli

¹⁹ Nga hu rendwe Muṋe wa zwoṱhe ḓuvha na ḓuvha; u a ri hwala, ndi Ene Mudzimu Mutshidzi washu.

²⁰ Mudzimu washu ndi Mudzimu Mutshidzavhathu; ndi Muṋe washu, ndi Muṋe wa zwoṱhe, u ri lamukisa lufuni.

²¹ Ngoho Mudzimu u ḓo devhekanya ṱhoho dza maswina awe; vhane vha ṱana milandu yavho u ḓo pwasha dethele ḽavho ḽo lukwaho mavhudzi.

²² Muṋe wa zwoṱhe o amba a ri, “Ndi ḓo vhuisa vhathu vhanga vha tshi bva Bashani, naho vho mbwandamela vhudzivhani ha lwanzhe, ndi ḓo vha ṋula,

²³ uri vha ṱambe milenzhe nga malofha a maswina, mmbwa dzavho dzi a ṋanzwe dzi fure.”

Mudzimu Mupembelwa-nga-Israele

²⁴ Mudzimu, wo vhonwa nga vhoṱhe u tshi ḓala muḓalo wó kunda, vha vhona u tshi dzhena fhethu hau hukhethwa, Iwe Mudzimu wanga, Khosi yanga,

²⁵ wó tangwa nga vhaimbi na vhalidzi vha zwilidzo, vhasidzana vha tshi khou lidza tshele.

²⁶ Vhumbani dzikhwairi ni imbele Mudzimu, rendani Muṋe washu, inwi vhaḓuhulu vha Jakopo!

²⁷ Ngoyu Benyamini, ene muṱuku, o vha ranga phanḓa, ha tevhela vhahulwane vha Juda na tshigwada tshavho, na vhahulwane vha Zebuloni, na vha Nafuthali.

Mudzimu Muluvhiwa-nga-tshakha

²⁸ Mudzimu, sumbedza maanḓa au, maanḓa e wa ri tshidza ngao,

²⁹ a tshi bva thembeleni Jerusalema, hune mahosi vha u ḓisela nduvho.

³⁰ Kaidza Egipita, heḽiḽa buka ḽi dzulaho ṱhangani; kaidza dzitshakha, heḽo sambi ḽa dzimboho na ṋamana dzadzo, vha vhuya vha u khotha vha ṋekedza siliva. Balanganya havho vhathu vha no funa nndwa!

³¹ Hu ḓo ḓa vhaḓinḓa vha tshi bva Egipita, vha luvha Mudzimu nga zwifulwa zwa musinaseṱha; Vhakushu vha ḓo rabela Mudzimu vhó imisa zwanḓa.

Mudzimu Murendwa-nga-mivhuso

³² Inwi mivhuso ya shango, imbelani Mudzimu, rendani Muṋe wa zwoṱhe nga nyimbo,

³³ Ene Munamelalutombo, lutombo lwa kale-kale! Thetshelesani a tshi bvumisa he ngindii-ngindii.

³⁴ Ḓivhadzani maanḓa a Mudzimu, u vhusa Israele nga vhugala, maanḓa awe a fhira lutombo.

³⁵ Mudzimu u ofhisa hani a tshi bva fhethu hawe hukhethwa! Ndi Ene Mudzimu wa Israele; u ṋea vhathu vhawe nungo na maanḓa. Mudzimu nga a rendiwe!