DZIPHISALEMA 66 - BIVHILI KHETHWA Mafhungo Madifha

Thendo dza vhoṱhe, dza vhanzhi, dza muthihi Thendo dza ḽifhasi ḽoṱhe

Luimbo lwe lwa sikelwa malogwane, Phisalema.

¹ Ḽifhasi ḽoṱhe nga ḽi pembelele Mudzimu,

² hulisani dzina ḽawe nga nyimbo, mu imbeleni thendo!

³ Vhudzani Mudzimu ni ri, “Mishumo yau i ofhisa hani! Maanḓa au ndi mahulu; maswina au u a khothisa phanḓa hau a luvha.

⁴ Ḽifhasi ḽoṱhe ḽi a u luvha ḽo gwadama, vha u renda nga nyimbo, vha renda dzina ḽau.”

Thendo dza Israele

⁵ Iḓani ni vhone zwimangadzo zwe Mudzimu a ita; zwe a itela vhathu ndi zwihulu:

⁶ o xisa lwanzhe ha sala ho oma, vha wela mulambo nga milenzhe. Henefho ndi he ra mu takalela,

⁷ Ene a vhusaho nga maanḓa awe lini na lini. Maṱo awe a dzula o sedza dzitshakha; mavhanga a songo tsha ḓihudza.

⁸ Inwi dzitshakha, rendani Mudzimu washu, mu imbeleni thendo!

⁹ Ndi Ene a ri tshidzaho, ha litshi milenzhe yashu i tshi redzemuwa.

¹⁰ Mudzimu, wo ri linga nga mulilo, wa ri kulutedza unga siliva.

¹¹ Wo ri dzhenisa mambuleni, wa ri hwesa mihwalo i lemelaho,

¹² wo litsha vhathu vha tshi ri tumba nṱha ha ṱhoho; ro fhira nga muliloni na maḓini, ra kona u ḓiphiṋa nga zwinzhi.

Thendo ya muthihi

¹³ Ndi ḓo ḓisa nduvho dzi fhiswaho nḓuni yau, nda khunyeledza zwe nda u anela,

¹⁴ zwe nda amba nga mulomo wanga musi ndi khomboni.

¹⁵ Ndi ḓo u ṋekedza zwiṱhavhelo zwo nonaho, na thutha dzi nukhelelaho dzi tshi fhiswa, ndi ḓo ṋekedza dzimboho na mbokoṱo.

¹⁶ Iḓani ni pfe, noṱhe ni ofhaho Mudzimu, ndi ḓo ni vhudza zwe a nnyitela:

¹⁷ ndo mu ṱavhela mukosi, a mbo ḓi nndamulela, lulimi lwanga lwa mu renda.

¹⁸ Ngavhe mbiluni yanga hu na vhuvhi, ndi musi Muṋe wa zwoṱhe a songo nthetshelesa.

¹⁹ Hone ngoho Mudzimu o nthetshelesa a pfa thabelo yanga.

²⁰ Nga hu rendwe Mudzimu, ho ngo landula thabelo yanga, lufuno lwawe a lwo ngo vhuya lwa dzinginyea.