DZIPHISALEMA 65 - BIVHILI KHETHWA Mafhungo Madifha

Mudzimu Mapakulile Mudzimu wa tshilidzi

Phisalema ya Dafita, luimbo lwe a sikela malogwane.

¹ Mudzimu, wo tewa nga thendo Tsioni, zwe ra u anela zwi ḓo khunyeledzwa;

² u pfa thabelo dzashu; vhathu vhoṱhe vha ḓo ḓa ha Iwe

³ vha tshi ḓiswa nga milandu yavho. Nangwe vhutshinyi hashu ho ri tsikeledza, Iwe u ri hangwela hone.

⁴ Wa mashudu ndi uyo ane wa mu nanga, wa mu sendedza tsini, a dzula pfamoni dzau. U ḓo fushwa nga zwivhuya zwa nḓuni yau, zwa thembele yau khethwa!

Mudzimu Ramaanḓa

⁵ Iwe Mudzimu Mutshidzi washu, u a fulufhedzea; u pfa thabelo dzashu, wa ita zwi ofhisaho. Ḽifhasi ḽoṱhe nga he ḽa guma, na malwanzhe a kule-kule, zwo fulufhela Iwe.

⁶ Wo tika dzithavha nga maanḓa au; wo fuka nungo.

⁷ Iwe u dzikisa u unga ha malwanzhe na phosho ya magabelo ao, wa ladza mifhirifhiri ya dzitshakha,

⁸ uri vha dzulaho kule-kule mugumoni wa ḽifhasi vha ofhe maḓembe au. U ita uri vhubvaḓuvha na vhukovhela hu pembelwe nga dakalo.

Mudzimu Mapakulile

⁹ U londola ḽifhasi wa ḽi ṋea ndalo, wa ḽi pfumisa zwihulu; madzambo au o ḓala maḓi, uri vhathu vha kaṋe khaṋo khulu. U zwi ita nga u rali:

¹⁰ He vha lima u hu nisela mvula, wa hu ṋukadza nga maḓi, mavu u a ṋukadza nga vhusuṱo, wa shudufhadza zwa aluwa.

¹¹ U ambadza ṅwaha tshiala tsha khaṋo khulu; hune wa fhira hone hu ela mapfura;

¹² na pfulo ya phangani i a anda, mivhundu ya ambara dakalo;

¹³ mafulo a tshatshama miṱambi ya nngu, magovha a ḓala mavhele, a pembela, a imba nga dakalo.