DZIPHISALEMA 63 - BIVHILI KHETHWA Mafhungo Madifha

U ṱuvha Mudzimu Mudzimu tshiṱuvho tshanga

Phisalema ya Dafita ye a sika e Phangani ya Juda.

¹ Mudzimu, u Mudzimu wanga, ndo u ṱuvha; ndo u ṱulutshela nga mbilu yanga yoṱhe, zwa nga nḓala na ḓora, ndí fhano shangoni ḽo omaho, ḽo bvaho, hu si na maḓi.

² Ndo ṱuvha u u ṱalela nḓuni khethwa, uri ndi vhone maanḓa au na vhugala.

³ Lufuno lwau lu ntakadza u fhira na vhutshilo; mulomo wanga u ḓo u renda.

⁴ Ndi ḓo u livhuha vhutshilo hanga hoṱhe, nda imisa zwanḓa zwanga ndi tshi u rabela.

Mudzimu dakalo ḽanga

⁵ Ndi fushea nga Iwe nda nga ndo ḽa mapfura; mulomo wanga u ḓo u renda nga nyimbo.

⁶ Ndó lala ndi a u humbula, ndi u elekanya vhusiku hoṱhe.

⁷ Iwe wo ḓi vha Mutikedzi wanga; ndi fhululedza nga dakalo ndó khuda nga phapha dzau.

⁸ Mbilu yanga i nambatela Iwe, ndi tikiwa nga tshanḓa tshau tsha maanḓa.

Mudzimu Mulweli wanga

⁹ Vhane vha ṱoḓa u mmbulaha vha ḓo godimela fhasi-fhasi dindini ḽa ḽifhasi;

¹⁰ vha ḓo ḽiwa nga pfumo vha vha zwiḽiwa zwa dziphunguhwe.

¹¹ Ndi hone khosi i tshi ḓo pembelela Mudzimu, vhoṱhe vhane vha ana ngae vha mu zuwa, milomo ya mazwifhi yó no fhumudzwa.