DZIPHISALEMA 62 - BIVHILI KHETHWA Mafhungo Madifha

U fulufhela Mudzimu e eṱhe U dzumbama maswina

Phisalema ya Dafita ye a sikela malogwane, Jeduthuni.

¹ Musi ndi na Mudzimu, ndi hone ndo rudza mbilu, ndi Ene a ntshidzaho.

² Ndi Ene fhedzi a re bako ḽanga na Mutshidzi wanga; Mutsireledzi wanga ndi Ene, a thi nga sudzuluswi.

³ Nṋa ni ḓo litsha lini u sala muthu murahu? Noṱhe ni khou mu khokhovhedza na nga ni khou khurumedza luvhondo lwo tshingamaho, ni khou fuḓa luhura lwo waho.

⁴ Ni langana u mu dzhiela vhuhulwane hawe; ni takalela mazwifhi; ni shudufhadza nga milomo, mbiluni ni tshi mu teketela.

⁵ Musi ndi na Mudzimu, ndi hone ndo rudza mbilu, ndi fulufhela Ene fhedzi.

⁶ Ndi Ene fhedzi a re bako ḽanga, na Mutshidzi wanga; Mutsireledzi wanga ndi Ene, a thi nga dzinginyei.

⁷ Mudzimu ndi Ene Mutshidzi wanga, u a nkhulisa; tombo ḽanga ḽa maanḓa, vhukhudo hanga, ndi Mudzimu.

⁸ Inwi vhathu, fulufhelani Ene misi yoṱhe, mu ṱanzeleni zwoṱhe zwa mbiluni dzaṋu; Mudzimu ndi Ene vhukhudo hashu.

Muthu ene ndi mini?

⁹ Vhathu vhone vha tou vha mufemo, na vhahulwane a si tshithu; naho vha fhanzhelwa tshikaloni tshithihi, vha kha ḓi fhirwa nga mufemo.

¹⁰ U songo ḓitika nga u kandeledza vhaṅwe; vhuvemu vhu nga si u vhuedze tshithu; arali lupfumo lu tshi anda u songo vhea mbilu yau khalwo.

¹¹ Ndo pfa Mudzimu a tshi amba a dovha, a tshi ri maanḓa ndi awe.

¹² Lufuno lu sa dzinginyei ndi lwa Iwe Muṋe wa zwoṱhe. Iwe u pfufha muthu u tshi tevhedza mishumo yawe.