DZIPHISALEMA 60 - BIVHILI KHETHWA Mafhungo Madifha

Mudzimu u a rwa, Mudzimu u a tshidza Tshanḓa tsha Mudzimu tshi rwaho

Tshirendo tsha Dafita tshe a sikela malogwane; tshi pfi tshi imbiwe nga kuimbelwe kwa luimbo lune lwa pfi “Phendephende”. Ndi vhuṱanzi ha nndwa dzawe musi o vutshelwa nga Vhaaramu vha Misopothamia na Vhaaramu vha Tsoba, Juaba a huma a dia Vhaedomo, ha vhulawa vha 12 000 Govhani ḽa Muṋo.

¹ Mudzimu, wo ri laṱa wa ri fhandekanya. Wo vha wo sinyuwa; dovha u ri tonde.

² Wo dzinginya ḽifhasi wa ḽi fhandukanya; dovha u thivhe mitwe yaḽo, ḽi kha ḓi dzinginyea!

³ Wo ri livhanya na zwi konḓaho, wa ri kambisa ra pepeleka.

⁴ Wo ri ṱomela tshiga ra tshi kuvhanganela, mmbi dzashu dza vha na nungo, ra tinya misevhe.

Tshanḓa tsha Mudzimu tshi lamulelaho

⁵ Ri fhindule, u ri tshidze nga tshanḓa tshau tsha maanḓa, u lamukise vhalanda vhau vha fulufhedzeaho.

⁶ Mudzimu o amba e fhethu hawe hukhethwa, a ri, “Ndi ḓo kunda maswina nda kovha Shikheme, Govha ḽa Sukotho nda ḽi kovhekanya;

⁷ Giliadi ndi ḽanga, na shango ḽa Manase; Efraimi ndi nguwane yanga, luḓo lwanga lwa vhuhosi ndi Juda;

⁸ Muaba ndi sambelo ḽanga; Edomo ndi posa navhula yanga, ha vha u sumbedza uri ndi ḽanga; inwi Vhafilista, mphululedzeni ni luvhe!”

⁹ Ndi nnyi a no ḓo ntswikisa Edomo, nda dzhena musanda waho wo tangwaho nga mitsheṱo?

¹⁰ Ndi nnyi arali e si Iwe Mudzimu? Hone zwino wo ri laṱa, Mudzimu, hufha u si tsha tshimbila na mmbi dzashu.

¹¹ Iḓa u ri phalale musi wa khombo, muthu ha farisi tshithu.

¹² Rí na Mudzimu ri ḓo lwa sa vhahali, Ene u ḓo kandekanya maswina ashu.