DZIPHISALEMA 6 - BIVHILI KHETHWA Mafhungo Madifha

O tsikeledzwaho nga vhulwadze na maswina “Humela kha nṋe u mphodze Muṋe wanga!”

Phisalema ya Dafita ye a sikela malogwane; i pfi i imbiwe hu tshi lidzwa mbila dza tsinga ṱhanu na tharu.

¹ Yawee Muṋe washu, u songo tsha nkaidza wo sinyuwa, u songo nthwa musi u tshi duga nga mbiti.

² Muṋe washu, nkhathutshele; ndi khou fhelela ndi tshi ya. Mphodze, miraḓo yanga yo kulekana.

³ Ndo hanganea tshoṱhe. Yawee Muṋe washu, u ḓo vhuya wa nkhathutshela lini?

⁴ Vhuya Muṋe washu, mmbofholole, ntshidze, hufha u na vhuthu.

⁵ Kha vho faho haho ane a kha ḓi u elelwa; ndi nnyi ane a kha ḓi u renda henengei vhudzulavhafu?

⁶ U gomela hanga ho no tou nnetisa. Vhusiku hoṱhe ndi rothisa miṱodzi thovho yanga ya vhuya ya ṋukala; vhulalo hanga ndi vhu lovhedza nga miṱodzi.

⁷ Maṱo anga o no tou punda nga u lila; ha tsha vhona nga mulandu wa vhakandeledzi vhanga.

“Muṋe washu o pfa thabelo yanga.”

⁸ Ṱuwani maṱoni anga noṱhe inwi vhaitazwivhi, Muṋe washu o pfa tshililo tshanga!

⁹ Muṋe washu o pfa khumbelo yanga ndi tshi ḓiṱukufhadza, Muṋe washu u ṱanganedza thabelo yanga.

¹⁰ Maswina anga oṱhe a ḓo tou tetemela, a ḓo huma kathihi fhedzi o shona.