DZIPHISALEMA 58 - BIVHILI KHETHWA Mafhungo Madifha

U sengiswa ha vhavhusi vha tshiṱuhu U hwelelwa havho

Tshirendo tsha Dafita tshe a sikela malogwane; tshi pfi tshi imbiwe nga kuimbelwe kwa luimbo lu no ri, “U si lozwe!”

¹ Ngoho inwi vhavhusi ni vhea milayo yo teaho naa? Ni haṱula vhathu ni sa ṱaluli naa?

² Hufha mbiluni dzaṋu ni tshi luka vhunwa; zwanḓa zwaṋu zwa huvhadza fhano shangoni.

³ Vhavhi vha pambuwa vha tshee ḽilani; tshee vha bebwa ndi vhadzia-u-zwifha.

⁴ Vha na vhuṱungu vhu no nga ha tshitemahe, vho ḓidzingisa khole unga vuluvulu,

⁵ uri ḽi si pfe maipfi a mudambiki, naho e makone a manditi.

Ṱhamu yavho

⁶ Mudzimu, vha kulekanye maṋo, Muṋe washu, swarula ṱhaha dza ndau.

⁷ Ngavhe vha tshi nyamalala unga maḓi a ṋwelelaho, vha kandekanywa vha puta unga hatsi.

⁸ Ngavhe vha tshi nga khumba i no enda i tshi fhelela, vha nge gambutshela ḽi sa vhuyi ḽa vhona ḓuvha!

⁹ Ngavhe vha tshi tshenuwa vho kumbiwa vha kudzwa kule, mulilo u tshi kha ḓi tou dugu, khali dzi sa athu vhila.

¹⁰ Ndi hone vhavhuya vha tshi ḓo takala vha tshi vhona vhavhi vha tshi lifhedzwa; vha ḓo ṱamba milenzhe nga malofha a vhavhi.

¹¹ Vhathu vha ḓo ri, “Vha no fulufhedzea ngoho vha a pfufhiwa; ngoho Mudzimu u hone a no haṱula shango.”