DZIPHISALEMA 57 - BIVHILI KHETHWA Mafhungo Madifha

“Ndo tshidzelwa u imbela Mudzimu.” Vhukhudo

Tshirendo tsha Dafita tshe a sikela malogwane musi o dzhena bakoni nga u shavha Saulo. Tshi pfi tshi imbiwe nga kuimbelwe kwa luimbo lu no ri, “U si lozwe!”

¹ Nkhathutshele Mudzimu, yawee, nkhathutshele! Vhukhudo hanga ndi Iwe, ndi khuda nga murunzi wa phapha dzau khombo dza vhuya dza fhira.

² Ndi vhidzelela Mudzimu wa ṱaḓulu-ṱaḓulu, ndi vhidzelela Mudzimu we a nnyitela zwoṱhe.

³ U ḓo ntsumbedza lufuno lwawe na u fulufhedzea; u ḓo mphalala e ngei ṱaḓulu, a ntshidza; Mudzimu nga dzawe u ḓo shonisa vha no ṱoḓa u nndoba nga mulenzhe.

⁴ Ndo lala vhukati ha dzindau, one mavhanda. Maṋo avho ndi mafumo na misevhe, ndimi dzavho ndi mapanga o ṱuṱulwaho.

⁵ Mudzimu, hula u fhire makole, vhugala hau vhu ḓadze ḽifhasi ḽoṱhe!

⁶ Vho nthetshela zwikwekwe, ndo kulekana nga maṱungu. Vho mmveela khunḓa – khunḓa yo fasha muvei!

Thendo

⁷ Mudzimu, ndo rudza mbilu, yo rula tshoṱhe. Ndi ḓo imba nda u renda.

⁸ Mbilu yanga, vuwa! Haripa na mbila, vuwani! Ndi ḓo vusa mapfuvhi!

⁹ Muṋe wa zwoṱhe, ndi ḓo u renda tshakha dzi tshi zwi pfa, ndi ḓo u imbela kha tshakha dzoṱhe.

¹⁰ Lufuno lwau lu ṋanzwa makole, u fulufhedzea hau hu swika lutomboni.

¹¹ Mudzimu, hula u fhire makole, vhugala hau vhu ḓadze ḽifhasi ḽoṱhe!