DZIPHISALEMA 55 - BIVHILI KHETHWA Mafhungo Madifha

Vhaḽanawe ndi vhavhulahi Vhavhulahi

Luimbo lwa Dafita lwe a sikela malogwane; lu pfi lu imbiwe hu tshi lidzwa haripa.

¹ Yawee Mudzimu, thetshelesa thabelo yanga; u songo mpfuralela ndi tshi lila!

² Nthetshelese u mphindule; zwitumbambiluni zwo tou ntsikeledza; a thi aweli

³ nga mukosi wa maswina anga, ndo kandeledzwa nga vhavhi; vha ntshoshela nga khombo, vho ntsinyutshela, vha a mmbenga.

⁴ Mbilu yanga i pfa vhuṱungu; nyofho dza lufu dzo nngwela.

⁵ Ndo farwa nga nyofho, ndi ita na u tetemela, nyofho dzi a nkhokhovhedza.

⁶ Ndi ri, “Ngavhe ndi na phapha unga ḽiivha! Ndo vha ndi tshi ḓo fhufha nda yo dzula kule;

⁷ ee, ndo vha ndi tshi ḓo shavhela kule nda yo lala phangani,

⁸ nda ṱavhanya u wana vhukhudo, nda tinya u pomokwa hu no nga maḓumbu a titaho.”

⁹ Muṋe wa zwoṱhe, vha vilinganye, u fhiriṱanye ndimi dzavho! Fhano muḓini ndi vhona u huvhadzana na mufhirifhiri.

¹⁰ Vha u mona vhusiku na masiari vha tshi dadamala nṱha ha mbondo dzawo. Ngomu hawo hu na khombo na mufhirifhiri;

¹¹ muḓi uyu vho u ṱahadza; u kandeledzana na vhufhura a zwi fheli mikotoni yawo.

¹² Ngavhe a nkolelaho o vha e swina, ndo vha ndi tshi ḓo konḓelela; a mmvutshelaho ngavhe ḽo vha ḽi swina, ndo vha ndi tshi ḓo ḽi dzumbama;

¹³ hone zwi khou itwa nga inwi thanga yanga, inwi ṱhama yanga, inwi khonani yanga ye nda i ḓowela;

¹⁴ ro vha ri tshi ḓiphiṋa nga u somolana zwa haṋwani, ri tshi ya nḓuni ya Mudzimu u yo mu luvha na magogo.

Mudzimu Mulifhedzi

¹⁵ Ngavhe vha tshi fa, vha tou milwa nga shango vha tshi vhona; hu miṱani yavho, hu mbiluni, ho ḓala vhuvhi.

¹⁶ Hone nṋe ndi rabela Mudzimu, Muṋe washu u ḓo ntshidza.

¹⁷ Nga madekwana, nga matsheloni, na masiari ndi ṱahisa zwililo zwanga ndi tshi gomela; Ene u ḓo ḓi pfa ipfi ḽanga.

¹⁸ U ḓo ntshidza nda si huvhale musi ndi nndwani; vhanzhi vha ḓo ima na nṋe.

¹⁹ Mudzimu, Ene a vhusaho tsha kale na kale, u ḓo vha shonisa; hufha vha sa rembuluwi, na Mudzimu vha sa mu ofhi.

²⁰ Hufha vha tshi lwa na nṋe khonani yavho, vha tshi laṱa zwe ra vhofha.

²¹ Vho vha vhe na haṋwani ha u ḓifha ngeno mbilu yo ḓala nndwa; maipfi avho o vha a tshi suvhelela u fhira mapfura, ngeno e mafumo o angaladzwaho.

²² “Kumedza Muṋe washu mihwalo yau; Ene u ḓo u londola; ha nga vhuyi a laṱedza a no fulufhedzea.”

²³ Hone Iwe Mudzimu u ḓo vha wisela dindini wa vha lozwa; vhathu vha fhaladzaho malofha, vha vhufhura, a vha nga lalami. Hone nṋe ndi fulufhela Iwe.