DZIPHISALEMA 52 - BIVHILI KHETHWA Mafhungo Madifha

Vhuyo ha mupfumi wa tshiṱuhu Lulimi lwa u lozwa

Luimbo lwa Dafita lwe a sikela malogwane musi Doege wa Edomo o yo sevha Saulo uri Ahimelekhe o ṱanganedza Dafita.

¹ Iwe munna wa vhuhali, u ṱongiselani vhunwa hau? Tendá lufuno lwa Mudzimu lu sa dzinginyei!

² U ḓi luka vhunwa ha u lozwa vhaṅwe; lulimi lwau ndi luare lu fhiraho; muluki wa vhufhura ndiwe!

³ U funa zwivhi wa vhenga zwivhuya; u takalela mazwifhi wa sanda ngoho.

⁴ U funa zwi no vhaisa vhaṅwe fhedzi; lulimi lwau ndi lwa u fhura.

U kaṱudzwa ha mulevhi

⁵ Mudzimu u ḓo u pwashekanya wa si tsha vuwa; Mudzimu u ḓo u tsimbeledza a u doba a u posa kule wa si tsha vhona haya hau: u ḓo u tupula shangoni ḽa vha tshilaho.

⁶ Vha no fulufhedzea vha ḓo zwi vhona vha ofha, vha sea wa vhuhali vha ri,

⁷ “Edzonu vhona muthu we a si ḓitike nga Mudzimu, we a fulufhela u anda ha lupfumo lwawe, a ḓitika nga vhufhura hawe!”

A no khuda nga Mudzimu

⁸ Hone nṋe ndi muolivi mudala wo ṱavhiwaho nḓuni ya Mudzimu; ndi fulufhela lufuno lwa Mudzimu lu sa dzinginyei lini na lini.

⁹ Wo ntonda, ndi dzula ndi tshi u livhuha, nda ḓivhadza vhuvhuya hau hó kuvhangana vhathu vha fulufhedzeaho.