DZIPHISALEMA 51 - BIVHILI KHETHWA Mafhungo Madifha

Phisalema ya u bula vhutshinyi na u humbela khangwelo U ḓivhuedza

Phisalema ya Dafita ye a sikela malogwane musi muporofita Nathani o mu kaidza nge a ita vhupombwe na Batshiba.

¹ Mudzimu, nkhathutshele, hufha lufuno lwau lu sa dzinginyei. Tshilidzi tshau hufha tshi tshihulu, ṱanzwa vhutshinyi hanga;

² ṱanzwa vhuvhi hanga vhu fhele tshoṱhe, ndi bve tshika dza zwoṱhe zwe nda khakha.

³ Zwe nda tshinya ndi a zwi ḓivha, na zwe nda khakha a thi koni u zwi hangwa.

⁴ Ndo u khakhela, ndo khakhela Iwe u woṱhe, ndo ita zwi u nengisaho. Ndi zwine u tshi nkhaṱhula wa si khakhe, u tshi nndaṱa zwa vha zwo tea.

⁵ Nṋe ndo bebwa ndi muvhi; mme anga a tshi nṱanganedza muvhilini ndo vha ndi tshi ḓi vha mukhakhi.

“Ntsikele mbilu ntswa!”

⁶ Iwe u tama mbilu ya muthu i tshi vha na ngoho, mpfunze vhuṱali, mbilu yanga i kame ngaho.

⁷ Nkhandulule nga muhisopo ndi kune, nṱanzwe ndi tshene u fhira mahaḓa.

⁸ Kha ndi pfe ndo takala ndi pembele, marambo e wa a vunḓekanya nga a tshine.

⁹ U songo tsha sedza zwe nda tshinya, thutha vhuvhi hanga hoṱhe.

¹⁰ Yawee, Mudzimu, ntsikele mbilu yo ṱambaho! Ngomu hanga u longe muya muswa u fulufhedzeaho.

¹¹ U songo nthudzela kule na Iwe, u songo nnzhiela Muya Mukhethwa wau.

¹² Kha ndi dovhe ndi takale nga u ḓivha uri wo ntshidza, u ntike nga muya u takalelaho u ita zwine wa funa.

¹³ Ndi hone ndi tshi ḓo funza vhatshinyi nḓila dzau, vhakhakhi vha konou humela ha Iwe.

¹⁴ Mudzimu, mmbofholole kha mulandu wa u shulula malofha, Iwe Mudzimu Mutshidzi wanga. Ndi hone lulimi lwanga lu tshi ḓo fhululedza zwe wa ntshidza.

¹⁵ Muṋe wa zwoṱhe, vula mulomo wanga ndi kone u u renda.

¹⁶ Hufha u sa takadzwi nga zwiṱhavhelo; nda u ṋekedza nduvho yo fhiswaho ndi nga si u takadze.

¹⁷ Tshiṱhavhelo tshi takadzaho Mudzimu ndi u ṱungufhala nga mulandu wa vhutshinyi hau; Iwe Mudzimu a u nyadzi mbilu yo pwashekanaho, i ḓiṱukufhadzaho.

¹⁸ Tonda Tsioni u u itele vhuthu, dovha u vuse mitsheṱo ya Jerusalema;

¹⁹ ndi hone u tshi ḓo takadzwa nga zwiṱhavhelo zwo teaho: nga nduvho dzo fhiswaho, ha ḓo konou ṋekedzwa mbohwana aḽiṱarini yau.