DZIPHISALEMA 50 - BIVHILI KHETHWA Mafhungo Madifha

Muhaṱuli wa shango U swika ha Muhaṱuli

Phisalema ya Asafu.

¹ Muṋe washu Mudzimu Ramaanḓaoṱhe u khou amba, u vhidza ḽifhasi u bva vhubvaḓuvha u swika vhukovhela.

² Mudzimu u vhonadza lupenyo lwawe e Tsioni, muḓi wa manakanaka.

³ Mudzimu washu u khou ḓa, ha fhumuli, phanḓa hawe hu na mulilo u lozwaho, o tangwa nga ḓumbu ḽa maanḓa.

⁴ U vhidza ḽiṱaḓulu na ḽifhasi uri zwi vhe ṱhanzi a tshi haṱula vhathu vhawe.

⁵ U ri, “Nkuvhanganyeleni vhathu vhanga vha fulufhedzeaho vhe vha vhofha mulanga na nṋe nga tshiṱhavhelo!”

⁶ Ḽiṱaḓulu ḽi a ṱanziela ḽa ri, “Mudzimu ndi Muhaṱuli, ha khakhi.”

Zwine a ṱoḓa kha vhathu vhawe

⁷ “Vhathu vhanga, thetshelesani ndi ni vhudze! Iwe Israele, ndi khou u hwesa mulandu! Mudzimu ndi Nṋe, ndi Mudzimu wau.

⁸ A thi u kaidzeli zwiṱhavhelo zwau, hufha u tshi ḓi nṋekedza nduvho dzo fhiswaho.

⁹ Hone a thi nga ṱanganedzi mbohwana dzi bvaho dangani ḽau, na mbokoṱo dzi bvaho miṱambini yau.

¹⁰ Hufha phukha dzoṱhe dza shango dzi dzanga, na kholomo dzo phaphaho mivhundu ya tshigidi.

¹¹ Zwiṋoni zwoṱhe zwi fhufhaho thavhani ndi a zwi londola, na zwoṱhe zwi tshimbilaho ḓakani ndi zwanga.

¹² Ndí na nḓala ndi nga vhudza iwe naa? Hufha ḽifhasi na zwi re khaḽo zwi zwanga.

¹³ Kani ndi ḽa ṋama ya dzimboho? Ndi nwa malofha a mbudzi naa?

¹⁴ Tshiṱhavhelo tshi ṋekedzwaho Mudzimu ndi thendo; tshau nga hu vhe u khunyeledza zwe wa anela Waṱaḓuluṱaḓulu.

¹⁵ Zwó vhifha u nṱavhele mukosi, ndi ḓo u lamukisa wa konou nkhulisa.”

Zwine a vhudza vhavhi

¹⁶ Mudzimu a tshi amba na vhavhi u ri, “U itelani u tshi ṱolou nkhumbudza mulanga wanga, wa dubekanya ndaela dzanga nga mulomo?

¹⁷ Hufha u sa funi u laiwa, u tshi landula maipfi anga.

¹⁸ Wá vhona fobvu u konana naḽo, na dziphombwe ndi khonani dzau.

¹⁹ U endela u amba mavhi, lulimi lwau lu luka vhufhura,

²⁰ wa dzula wa pomoka murathu wau, wa nyefula ṅwana wa mme au vhukuma.”

“Ni vhone!”

²¹ “U tshi ita zwoṱhe zwenezwo ndi fhumule naa? U vhona unga Nṋe ndi nga iwe? Hone zwino ndi a u kaidza, ndi u hwesa mulandu.

²² “Thetshelesani inwi vhane na hangwa Mudzimu, ndi sa ḓo ni balanganya ha si vhe na a ni lamukisaho!

²³ Tshiṱhavhelo tshi hulisaho Mudzimu ndi thendo; a thetshelesaho ndi ene a no ḓo tshidzwa nga Mudzimu.”