DZIPHISALEMA 5 - BIVHILI KHETHWA Mafhungo Madifha

Thabelo ya nga matsheloni ya u humbela u lamulelwa nga Mudzimu U bubela thabelo

Phisalema ya Dafita ye a sikela malogwane; i pfi i imbiwe hu tshi lidzwa tshiṱiringo.

¹ Muṋe washu, thetshelesa zwine nda amba, u pfe u fhihamelwa hanga!

² Iwe Khosi yanga, Mudzimu wanga, ipfa ndi tshi u ṱavhela mukosi! Hufha ndi tshi rabela Iwe.

³ U mpfe ndi tshi u rabela nga matsheloni. Ndi vhea thabelo yanga phanḓa hau ḽi tshi tsha, nda lindela phindulo yau.

Mudzimu Mulwela-zwi-re-zwone

⁴ Hufha u si Mudzimu a no takalela vhuvhi. Muvhi a u koni u mu swielela.

⁵ Matsilu a u funi u a vhona phanḓa hau, u vhenga vhaitazwivhi.

⁶ Vhadziauzwifha u a vha lozwa vhoṱhe. Muṋe washu u nengwa mufhaladzamalofha na pheṱhi.

U takalela nnḓu ya Mudzimu

⁷ Hone nṋe nga vhuthu hau ndi ḓo dzhena nḓuni yau, nda gwadama nda fhelela nga u ofha Iwe ndó livhana na thembele yau khethwa.

⁸ Muṋe washu, nthange phanḓa nga vhuvhuya hau; maswina anga khea o dzula o lavhelesa. Ntshimbidze nḓilani yau i si ya magombikwa.

U haṱulwa ha vhadziamazwifhi

⁹ Zwine vhathu avha vha amba a zwi fulufhedzei, mbiluni dzavho hu fhufhuma khombo fhedzi. Ndimi dzavho ndi dza u swaledzela, hone zwiambo zwavho zwi tshi bwela muthu tshalo.

¹⁰ Mudzimu, vha lifhedze, khunḓa nga i fashe muvei. Vha kudze kule, mivhango yavho a i fheli, vho u shandukela.

Tshiṱangu tsha mufulufheli

¹¹ Hone litsha vha khudaho nga Iwe vha pembele, vha litshe vha fhululedze nga hu sa fheli; tsireledza vhane vha funa dzina ḽau uri vha ḓiphiṋe ngaḽo.

¹² Iwe Muṋe washu u ḓo shudufhadza a no fulufhedzea, u ḓo mu tanga nga lufuno lwa tou nga tshiṱangu.