DZIPHISALEMA 49 - BIVHILI KHETHWA Mafhungo Madifha

Vhutsilu ha u ḓitika nga lupfumo Ndayo yo livhanaho tshakha dzoṱhe

Phisalema ya vhana vha Kora ye vha sikela malogwane.

¹ Hee inwi tshakha dzoṱhe, ipfani! Thetshelesani inwi noṱhe vhadzulapo vha mashango!

² Vhahulwane na vhathu zwavho, vhapfumi na vhashai!

³ Haṋwani hanga hu ḓo bva a vhuṱali, zwine nda elekanya zwi sumbedza ṱhalukanyo.

⁴ Ndi ḓo kolongonya nḓevhe nda thetshelesa ndayo, nda dzumbulula tshiphiri ndi tshi lidza haripa.

Lufu a lu na tshipfumelo

⁵ Zwa vhifha ndi ofhani ndó tingwa nga maswina,

⁶ vhathu vhane vha ḓitika nga lupfumo lwavho, vha zuwa u anda halwo?

⁷ Hufha hu si na murengululi wa muṅwe, a no bvisa tshipfumelo tsha vhutshilo ha muthu a ṋea Mudzimu.

⁸ Vhutshilo ha muthu vhu na mutengo muhulu, a vhu rengululwi.

⁹ A hu na a sa fi, a hu na a sa dzheni tshaloni.

Mufu u ṱuwa na mini?

¹⁰ Ndi nnyi a sa zwi ḓivhi uri na vhaṱali vha a fa? Na matsilu, na madodo, vhoṱhe vha a ḓi lovha, lupfumo lwavho lwa sala lu tshi ḽiwa nga vhaṅwe.

¹¹ Zwalo ndi mahaya avho lini na lini, vha dzula henefho ha fhira mirafho na mirafho, naho vho rina mashango madzina avho.

¹² Muthu na u pfuma háwe ha lengi u fa, u a ḓi lovha unga phukha.

¹³ Ndi yone nḓila ya vha no ita vhutsilu nga u ḓifulufhela; vha no fushea nga lupfumo lwavho vha fhedza nga u ralo.

¹⁴ Vha livha tshaloni unga nngu, lufu ndi lwone mulisa wavho; vha si na vhufhura vha ḓo vha vhusa ḽi tshi tsha; mivhili yavho i ḓo sinela zwaloni shangoni ḽa vhafu kule na mahaya avho.

¹⁵ A vha nṋe, Mudzimu u ḓo nthengulula, u ḓo nndamukisa maanḓani a lufu.

U ḓifhura nga murunzi wa ningo

¹⁶ U songo ḽa mbilu u tshi vhona muṅwe a tshi pfuma, u tshi vhona a tshi khokha lupfumo.

¹⁷ A tshi fa u ḓo ṱuwa na mini? Vhugala hawe vhu ḓo mu tevhela naa?

¹⁸ Naho vhutshiloni vhuno o vhona unga u na mashudu, vhathu vha mu khoḓa nga u vhona a tshi pfuma a tshi ya,

¹⁹ u ḓo ḓi tevhela vhokhotsi awe, a vha tsha ḓo vhona tshedza tsha vhutshilo.

²⁰ Muthu na u pfuma háwe ha lengi u fa, u a ḓi lovha unga phukha.