DZIPHISALEMA 48 - BIVHILI KHETHWA Mafhungo Madifha

Musanda wa Khosi khulu Musanda wa Mudzimu

Luimbo, phisalema ya vhana vha Kora.

¹ Muṋe washu ndi muhulwane, thendo khulu nga i ye khae musanda wa Mudzimu washu, thavhani yawe khethwa.

² Yo ri u naka, ya ri u lapfa, ya ḓisa dakalo shangoni ḽoṱhe. Thavha ya Tsioni ngeiḽaa devhula, wone musanda wa Khosi khulu.

³ Mudzimu u dzula pfamoni dzawo, u ḓihwa e dzhavhelo ḽawo.

Mahosi a tshi fhufhura dzinḓevhe

⁴ Vhonani mahosi o kuvhangana, vho ḓa u ri dia.

⁵ Vho ri u u vhona zwa vha somela, vha dzhenwa nga nyofho vha shavha vha tshi tou fhufhura nḓevhe.

⁶ Henefho vha thoma u tetemela nga nyofho, vha kulea nungo unga musadzi a tshi ṱoḓou vhofholowa,

⁷ zwa nga zwiḽa u tshi pwashekanya zwikepe zwa Tharashishi nga maḓumbu a vhubvaḓuvha.

⁸ Zwe ra zwi pfa ndi zwenezwo zwe ra zwi vhona nga ashu maṱo musanda wa Muṋe washu Ramaanḓaoṱhe, musanda wa Mudzimu washu: u ḓo u tika lini na lini.

Nyimbo dza u renda Mudzimu

⁹ Mudzimu, ro humbula lufuno lwau lu sa tseki rí ngomu thembeleni yau.

¹⁰ Mudzimu, dzina ḽau ndi ḽihulu, na thendo i yaho ha Iwe ndi khulu, i swika na mugumoni wa shango. Tshanḓa tshau tsha maanḓa tshi ita zwivhuya fhedzi.

¹¹ Thavha ya Tsioni nga i takale, vhananyana vha Juda nga vha pembele; wo ri lamulela nga khaṱhulo yau.

¹² Tshimbilani Tsioni, monani nawo, vhalani thawara dzawo,

¹³ sedzani mitsheṱo yo u tangaho, tandulani madzhavhelo awo, ni ḓo konou vhudza vhana vhaṋu, na ri,

¹⁴ “Hoyu ndi Ene Mudzimu, Mudzimu washu wa lini na lini; u ḓo ri endedza ra vhuya ra fa.”