DZIPHISALEMA 47 - BIVHILI KHETHWA Mafhungo Madifha

Khosi ya ḽifhasi

Phisalema ya vhana vha Kora ye vha sikela malogwane.

¹ Inwi tshakha dzoṱhe vhandani zwanḓa, fhululedzani Mudzimu ni ṱavhe mukosi nga dakalo.

² Muṋe washu, Waṱaḓuluṱaḓulu, u ofhisa hani, Ene Khosi khulu ya ḽifhasi!

³ O ita uri tshakha dzi ri luvhe, a dzi ita vhukando ha milenzhe yashu.

⁴ O ri nangela ifa ḽashu, shango ḽavhuḓi, ḽine Jakopo mufunwa wawe a ḽi zuwa.

⁵ Mudzimu o gonya ho ṱangana mifhululu, Muṋe washu o gonya ho ṱangana mibvumo ya dziphalaphala.

⁶ Rendani, rendani Mudzimu nga nyimbo! Rendani, rendani Khosi yashu nga nyimbo!

⁷ Mudzimu ndi Khosi ya ḽifhasi ḽoṱhe, mu rendeni nga phisalema!

⁸ Mudzimu u vhusa dzitshakha, Mudzimu u thukha kha khuluṋoni yawe khethwa.

⁹ Vhahulwane vha dzitshakha vha ḓo kuvhangana, vha vha vhathu vha Mudzimu wa Abrahamu. Mahosi a shango a vhuswa nga Mudzimu, ndi Ene Ambadzifhele.