DZIPHISALEMA 45 - BIVHILI KHETHWA Mafhungo Madifha

Mbingano ya khosi Vhugala ha khosi

Luimbo lwa vhana vha Kora lwa u imbela lufuno, lwe vha sikela malogwane; lu pfi lu imbiwe nga kuimbele kwa luimbo lune lwa ri “Phendephende”.

¹ Mbiluni yanga hu ela maipfi a u naka, luimbo lwanga ndi lu sikela khosi, lulimi lwanga ndi muthenga wa muṅwali makone.

² Wo naka u fhira vhathu vhoṱhe, u tshi zwa hu pfala maḓifha fhedzi; ndi zwe Mudzimu a u shudufhadza lini na lini.

³ Muhali, kungela pfumo! Wo ambara vhugala na lupenyo.

⁴ Namela u kunde nga vhugala hau, lwela ngoho u tsireledze vhaheḓana; nungo dzau dzi ḓo shuma zwi ofhisaho.

⁵ Misevhe yau yo ṱuṱulwa, kha i pfule mbilu dza maswina au, u vhuse dzitshakha.

⁶ Khuluṋoni yau ndi ya Mudzimu, i ḓo ima lini na lini. Luḓo lwau lwa vhuhosi wo lu fara nga u fulufhedzea.

⁷ U funa khaṱhulo mbuya wa vhenga vhuvhi, ndi zwe Mudzimu, a re Mudzimu wau, a u tela zwone, wa takala u fhira thanga dzau dzoṱhe.

⁸ Vhupila hau hoṱhe vhu nukhelela zwiḓolo zwa mere na bindamutshe na khinamoni; u takadzwa nga nyimbo dzi pfalaho pfamoni dzo ṱamiwaho nga ṋanga dza nḓou;

⁹ vhaṱanuni vhau ndi vhana vha mahosi, thungo ya tshauḽa tshau ho ima ene mufumakadzi ó ambara dza musuku wa Ofiri.

Zwo fanelaho muselwa

¹⁰ Edzou pfa iwe muselwa, thetshelesa ndi u vhudze! Hangwa vha hau na nnḓu ya khotsi au.

¹¹ Thovhele u takadzwa nga lunako lwau; ndi muṋe wau, mu luvhe!

¹² Vhathu vha Tiro vha ḓo u ḓisela nduvho, ha ḓa vhone vhapfumi vha lushaka vha u unga uri u vha fune.

¹³ Muselwa u pfamoni yawe, ndi mukololo, o naka hani! Tshifuko tshawe tsho ṱamiwa nga musuku.

¹⁴ U iswa ha thovhele o ambara maṱeleṱele. U tevhelwa nga pheletshedzi dzawe dza dzikhomba, vha ḓiswa ha iwe.

¹⁵ Vha endedzwa nga dakalo na maseo vha tshi dzhena pfamoni ya thovhele.

Khosi i tshi fulufhedziswa vhana

¹⁶ Thovhele nga a vhe na vhana vhane vha ḓo vhumbwa vhuhosi unga vhomakhulukuku wau; u ḓo vha vhea vha vhusa shango ḽoṱhe.

¹⁷ Ndi u renda nga nyimbo uri mirafho yoṱhe i si u hangwe, tshakha dzi u rende lini na lini.