DZIPHISALEMA 44 - BIVHILI KHETHWA Mafhungo Madifha

Thabelo ya lushaka ya u humbela u lamulelwa Maḓuvha aḽa a vhugala

Luimbo lwa vhana vha Kora lwe vha sikela malogwane.

¹ Vhokhotsi ashu vho ri vhudza; ro zwi pfa nga dzashu nḓevhe zwe Iwe Mudzimu wa ita vha tshi kha ḓi tshila, misi iḽa ya kale:

² Wo thatha dzitshakha nga tshau tshanḓa, vhudzuloni hadzo ha dzula vhone. Dzitshakha wo dzi kula nungo ha vha u vhofholola vhone.

³ A vho ngo wana shango nga ḽavho pfumo, a vho ngo kunda nga tshavho tshanḓa; ndi nga maanḓa au na tshanḓa tshau, ndi nga lupenyo lwa tshifhaṱuwo tshau, nge wa vha takalela.

⁴ Iwe u Khosi yanga, u Mudzimu wanga; ita uri Jakopo a kunde.

⁵ Ri dida maswina ashu nga Iwe, vha ri levhelaho ri vha kandekanya nga dzina ḽau.

⁶ A si vhura hanga vhune nda vhu fulufhela, na pfumo ḽanga ḽi nga si ntshidze;

⁷ ndi Iwe wo ri tshidzaho zwanḓani zwa maswina ashu, wa shonisa vhane vha ri vhenga.

⁸ Ri ḓo dzula ri tshi zuwa Mudzimu, ra mu livhuha lini na lini.

Misi ino ya khombo

⁹ Huno zwino wo ri laṱa, wa ri shonisa. Ri tshi bva pfumo a u tsha ri fhelekedza.

¹⁰ Wo ita uri ri shavhe swina ri vhuye ri tshi fhufhura nḓevhe; maswina a thuba zwe zwa vha zwi zwashu.

¹¹ Wo tenda vha tshi ri ṱhavha unga nngu, wa ri balanganya na mashango.

¹² Wo rengisa vhathu vhau nga mutengo u si gathi, wa vha ita zwithu zwi si na mutengo.

¹³ Vhahura vhashu vha ri holedza, vha ri sea vha tshi vhona zwe wa ri ita.

¹⁴ Wo ri nyadzisa nga dzitshakha ra vho tou vha ṱano.

¹⁵ Ḓuvha ḽoṱhe ndi ṱwa ndi tshi kolelwa, tshifhaṱuwo tshanga tsho tibwa nga ṱhoni

¹⁶ nga u pfa u goḓwa na maṱamba a maswina na vha no ṱoḓa u lifhedza.

“Wo ri laṱelani?”

¹⁷ Zwoṱhe hezwo zwo ri wela naho ri songo u hangwa kana ra shandukela mulanga wau.

¹⁸ Mbilu dzashu a dzo ngo u furalela, na milenzhe yashu a yo ngo pambuwa nḓilani yau.

¹⁹ Wo ri sia ri tshi takanyea vhukati ha dziphunguhwe, wa ri tiba nga swiswi ḽihulu ḽa tou bodo.

²⁰ Arali ro vha ro hangwa dzina ḽa Mudzimu washu, ra luvha muṅwe mudzimu,

²¹ Mudzimu o vha a si nga zwi ḓivhi naa? Hufha a tshi ḓivha zwiphiri zwi re mbiluni.

²² Ri tshi ṱwela u vhulawa ri vhulahelwa Iwe, ri tshi vhalwa sa nngu dzi no khou ya u ṱhavhiwa.

²³ Muṋe wa zwoṱhe, ndi mini u tshi kuvhama? Wá vuwaa! Vuwa! U songo ri laṱa tshoṱhe!

²⁴ Ndi mini u tshi tsinya iṱo? Khezwi u sa londi u tambudzwa hashu na u kandeledzwa hashu?

²⁵ Ro wela fhasi ra tou tsumbudzwa buseni, thumbu dza tou phashaa mavuni!

²⁶ Takuwa u ḓe u ri phalale! Ri tshidze! Hufha lufuno lwau lu sa dzinginyei.