DZIPHISALEMA 41 - BIVHILI KHETHWA Mafhungo Madifha

Thabelo ya mulwadze we a furalelwa nga dzikhonani Mutondavhashai

Phisalema ya Dafita ye a sikela malogwane.

¹ U na mashudu ane a londa muheḓana; Muṋe washu u ḓo mu lamulela musi wa khombo.

² Muṋe washu u ḓo mu londola a ḓi tshila, vhathu vhoṱhe vha khoḓa mashudu awe. Mudzimu ha nga tendi maswina awe a tshi ita zwine a funa ngae.

³ E thovhoni i fhisaho Muṋe washu u ḓo mu tika; u ḓo mu fhodza vhulwadzeni.

Vhaḽanawe ndi vhavhulahi

⁴ Nṋe ndo ri, “Muṋe washu, nkhathutshele! Mphodze, ndo u khakhela!”

⁵ Maswina anga a ri ngavhe ndi tshi welwa nga khombo. Vha ri, “U ḓo fa lini dzina ḽawe ḽa lovha?”

⁶ Vha tshi ḓa u nṱola vha nkhoya nga maipfi, ngeno mbilu dzavho dzo khuba vhunwa; vha tshi ri taku vha mbo ḓi nnyisela phungo mmbi.

⁷ Vha mmbengaho vha hevhedzana vha tshi nnyamba; vha ri ngavhe ndi tshi welwa nga khombo.

⁸ Vha ri, “Dwadze ḽo mu faraho ḽi ḓo mu vhulaha; o lala tshoṱhe, a nga si dovhe a vuwa.”

⁹ Na yone khonani yanga ya mbiluni ane nda mu fulufhela, ane ra ḽa muthathendilo, na ene o mmvutshela.

Mudzimu u a fulufhedzea

¹⁰ Hone Iwe Muṋe washu, nkhathutshele; mmvuse, ndi kone u vha lifhedza.

¹¹ Musi u tshi kaṱudza muḓalo wa maswina anga, ndi ḓivha uri u a ntakalela.

¹² Nṋe wo ntika, a thi na mulandu; u nkuvhatedza tsini hau lini na lini.

Thendo ya u ṱhaphudza bugu ya u thoma ya dziphisalema

¹³ Nga hu rendwe Muṋe washu Mudzimu wa Israele zwino na lini na lini. AMEN, AMEN!