DZIPHISALEMA 40 - BIVHILI KHETHWA Mafhungo Madifha

Luimbo lwa u livhuha na thabelo ya u humbela u lamulelwa Mudzimu u lamulela vha mu fulufhelaho

Phisalema ya Dafita ye a sikela malogwane.

¹ Ndo lindela Muṋe washu ndi sa fheli mbilu, Ene a nthetshelesa, a pfa tshililo tshanga,

² a nṋula dindini ḽi ofhisaho, a mmvisa kha lunwenwe ndo fashiwa, a nnyimisa nṱha ha dombo, a nnyendedza o ntsireledza.

³ O mpfunza luimbo luswa, luimbo lwa u renda Mudzimu washu. Vhanzhi vha ḓo zwi vhona vha ofha, vha fulufhela Muṋe washu.

⁴ U na mashudu ane a fulufhela Muṋe washu, a si luvhe midzimu i si tshithu kana a kungwa nga vha no luvha midzimu i siho.

⁵ Muṋe washu Mudzimu wanga, zwi kanukisaho zwe wa ita ndi zwinzhi! Ane a nga Iwe haho! Wo ri dzudzanyela zwi kanukisaho; ndi nga si kone na u zwi vhala zwoṱhe, zwo andesa!

⁶ Zwiṱhavhelo na nduvho a zwi u takadzi, hone nṋe wo mphula nḓevhe nda vha phuli yau tshoṱhe. Nduvho dzo fhiswaho na zwifuwo a si zwine wa zwi takalela.

⁷ Zwenezwo nṋe nda ri, “Ndi a ḓa! Buguni ho ṅwalwa hu tshi ambiwa nṋe.

⁸ Ndi takalela u ita zwine wa zwi funa, Iwe Mudzimu wanga; Mulayo wau ndo u vhulunga mbiluni yanga.”

⁹ U fulufhedzea hau ndo hu ḓivhadza vhathu vhau vhoṱhe vhó kuvhangana; Muṋe washu, Iwe u a ḓivha uri ndi nga si vhuye nda litsha u hu bula nga mulomo wanga.

¹⁰ A tho ngo dzumba mafhungo a vhuvhuya hau mbiluni yanga; ndo bula nda ri, u a fulufhedzea, u a tshidza; vhathu vhau vhoṱhe vhó kuvhangana a tho ngo vha dzumbela vhuthu hau na u fulufhedzea hau.

Thabelo ya u humbela u lamulelwa

¹¹ Muṋe washu, u songo litsha u nkhathutshela! Ngavhe vhuthu hau na u fulufhedzea hau zwi tshi ntsireledza!

¹² Ndo tangwa nga khombo dzi si na mbalo. Vhuvhi hanga ho mpfara, ndi vhona hone fhedzi. Ho ḓala u fhira mavhudzi a ṱhoho yanga; ho nkula nungo.

¹³ Muṋe washu, ngavhe u tshi ntshidza! Yawee, Muṋe washu, wa ṱavhanya u mphalalaa!

¹⁴ Vhoṱhe vhane vha ṱoḓa u mmbulaha nga vha shone vha hanganee. Vhane vha ṱoḓa ndi tshi wela khomboni vha hume vho shona!

¹⁵ Vhane vha tshi mmbona vha ri, “Koṱo, koṱo!” vha tshenuse, vha hanganee vho shona.

¹⁶ Vhoṱhe vhane vha u ṱoḓa, vhone nga vha takale vha ḓiphiṋe; vhoṱhe vhane vha funa u tshidzwa nga Iwe vha dzule vha tshi ri, “Muṋe washu ndi muhulwane!”

¹⁷ A vha nṋe ndi mushai, a thi na nungo, hone Iwe Muṋe wa zwoṱhe a u nkhangwi. Iwe u Mutiki wanga, u Mutshidzi wanga; Mudzimu wanga, u songo lenga!