DZIPHISALEMA 39 - BIVHILI KHETHWA Mafhungo Madifha

Mudzimu, fulufhelo ḽithihi fhedzi ḽa muthu U biḓela ha muimbi

Phisalema ya Dafita ye a sikela malogwane, Jeduthuni.

¹ Nṋe ndo ri, “Ndi ḓo linda matshilele anga, ndi si tende lulimi lwanga lu tshi nkhakhisa. Vhavhi vha tshi kha ḓi vha tsini hanga ndi ḓo ambara tshithivhamulomo.”

² Ndo nga tshimuma nda fhumula, zwi si mpfarise tshithu, maṱungu anga a ḓi ṋaṋa.

³ Mbilu yanga yo vha i tshi swa ngomu hanga, ndi tshi elelwa nda pfa ndi tshi tou swa. Nda vhuya nda tou zwi bula nda ri,

Vhutshilo vhu tou fhufha

⁴ “Muṋe washu, ntsumbedze uri vhutshilo hanga ho pfufhifhala hani. Wo ntela maḓuvha mangana? Ndi hone ndi tshi ḓo ḓivha uri vhutshilo hanga vhu tou fhufha!”

⁵ Vhona, wo mmbetshela maḓuvha a si gathi, miṅwaha yanga Iwe u vhona i si tshithu. Ngoho vhutshilo ha muthu ndi mufemo.

⁶ U dzhena a tshi bva, a nga u khou lora, a kuvhanganya, a khokha, a sa ḓivhi muḽi wazwo.

Ndayo i konḓaho

⁷ Zwino-ha Muṋe wa zwoṱhe, a hu tshee na muṅwe mulamuleli, nṋe ndi fulufhela Iwe.

⁸ Ntshidze vhutshinyini hanga hoṱhe, u songo tenda ndi tshi shonedzwa nga mavavhi!

⁹ Ndi nga tshimuna, ndi sokou ṅo, tenda zwo shuṅwa nga Iwe.

¹⁰ U songo tsha nthwa, ndo ṱahala nga matsivha a tshanḓa tshau.

¹¹ U rwa muthu nga ṱhamu yo teaho vhuvhi hawe, wa mu ḽela lupfumo unga tshifheṱi. Ngoho vhutshilo ha muthu ndi mufemo.

Mukosi

¹² Muṋe washu, ipfa thabelo yanga, thetshelesa tshililo tshanga, u songo sokou fhumula wa litsha ndi tshi lila! Ndi mueni wau u ḓi nga makhulukuku wanga vhoṱhe; ndi ṱhunḓu i si na mulamuleli, dzhavhelo ḽanga ndi Iwe fhedzi.

¹³ Nnditshe ndi thome u femuluwa ndi sa athu ṱuwa ndi si tsha vha hone!