DZIPHISALEMA 38 - BIVHILI KHETHWA Mafhungo Madifha

O tsikeledzwaho nga vhulwadze na vhutshinyi hawe Muhwalo u lemelaho

Phisalema ya Dafita ya u humbudza Mudzimu.

¹ Muṋe washu, u songo nkaidza wo sinyuwa, u songo nthwa u mbitini!

² Wo mpfula nga misevhe yau, wa tou nkanḓa nda zwi pfa!

³ Wo nkhalifhela, a hu tshee na hu si na mbonzhe muvhilini wanga, marambo anga a a rema oṱhe nga mulandu wa vhutshinyi hanga.

⁴ Ndo no tou mbwandamela dzivhani ḽa vhutshinyi hanga, vhu lemela unga muhwalo u sa hwalei.

⁵ Vhutsilu hanga ho mmbangela mbonzhe, dzo sina, dzi vho nukha.

⁶ Ndo kandeledzwa tshoṱhe, ndo rambalala, ḓuvha ḽoṱhe ndi ṱwa ndo ṱungufhala.

⁷ Khundu dzanga dzi tou duga nga dali, muvhili wo tou phapha mbonzhe.

⁸ Ndo ṱahala tshoṱhe, ndo pwashekana, ndi khou gomela nga vhuṱungu vhu re mbiluni yanga.

Muthathedzwa a si na mulamuleli

⁹ Muṋe wa zwoṱhe, hufha u tshi ḓivha zwoṱhe zwine nda lila, u femeleka hanga hufha u tshi khou hu pfa.

¹⁰ Mbilu yanga i tou sinḓa, a thi tshee na nungo, na u vhona a thi tsha vhona.

¹¹ Vha hashu na khonani dzanga vho no nṱamba nga u vhona maṱungu anga, mashaka anga o ima kule.

¹² Vhavhulahi vhanga vha rea zwikwekwe zwavho, vhahuvhadzi vhanga vha ri, “Kha ri mu khokhovhedze!” Vha ṱwa vha tshi nndangana ḓuvha ḽoṱhe.

¹³ Hone nṋe ndi nga dzinganḓevhe, thi pfi. A thi ambi, ndi mbevhevhe.

¹⁴ Ee, ndi nga a thi pfi tshithu, na u fhindula a thi fhinduli.

Fulufhelo ḽithihi fhedzi

¹⁵ Muṋe washu, ndo lindela Iwe. Mudzimu wanga, Muṋe wa zwoṱhe, Iwe u ḓo mphindula.

¹⁶ Ndi a rabela ndi ri, “U songo litsha vha tshi ntsea, u songo tenda vha tshi zuwa u kundwa hanga!”

¹⁷ Ndi ḓo ṱuwa ndi tshi wa, vhuṱungu hanga a vhu nkhumeli.

¹⁸ Ndi bula vhuvhi hanga, vhukhakhi hanga a vhu nnyawedzi.

¹⁹ Vhane vha tama ndi tshi fa vha na maanḓa, ndi vhanzhi vhane vha sokou mmbenga.

²⁰ Vha lifhedza zwivhuya nga zwivhi, vha lwa na nṋe nge nda funa u ita zwivhuya.

²¹ Muṋe washu, u songo nndaṱedza! Mudzimu wanga, u songo vha kule hanga!

²² Ṱavhanya u mphalala, yawee, Muṋe wa zwoṱhe, Mutshidzi wanga!