DZIPHISALEMA 37 - BIVHILI KHETHWA Mafhungo Madifha

Vhuyo ha vhavhi na vhavhuya Rudza mbilu!

Phisalema ya Dafita.

¹ U songo dinalea nga vhaitazwivhi, u songo tama vhutshilo ha vhatshinyi.

² Hufha vha tshi ḓo ṱavhanya u puta unga hatsi, vha tshi nga zwimela zwitete zwi sa lengi u fa.

³ Iwe fulufhela Muṋe washu u ite zwivhuya, ḓidzulele shangoni u tshile nga mulalo.

⁴ Takadzwa nga Muṋe washu, Ene u ḓo u ṋea zwine mbilu yau ya tama.

⁵ Nḓila dzau u dzi kumedze Muṋe washu. Mu fulufhele, Ene u ḓo shuma.

⁶ U ḓo dzumbulula u fulufhedzea hau ha nga tshedza; khaṱhuloni u ḓo bva wo ṱamba, wa penya unga ḓuvha masiari tshivhangalala.

⁷ U songo fhela mbilu, lindela Muṋe washu. U tshi vhona vha pfumaho nga vhufhura, u si dinalee.

⁸ Litsha mbiti, u furalele u sinyuwa; u songo dinalea, u sa ḓo tshinya.

⁹ Hufha vhatshinyi vha tshi ḓo lozwiwa. Vha fulufhelaho Muṋe washu vhone shango ḽi ḓo vha ifa ḽavho.

¹⁰ Hu si kale vhatshinyi a vha tsha ḓo vha hone; wa sedza hune vha dzula u ḓo wana vha si tsheeho.

¹¹ Hone vho vuḓaho, shango ḽi ḓo vha ḽavho, vha ḓo ḓiphiṋa nga lupfumo, ḽó lala.

Mulamuleli u hone

¹² Muvhi tshawe ndi u itela muvhuya tshimbevha, a mu zwondolola nga vengo.

¹³ Hone Muṋe wa zwoṱhe u sea muvhi; u ḓivha uri ḓuvha ḽawe ḽi a ḓa.

¹⁴ Vhavhi vha ṱomola mapanga avho, vha akha vhura vha tshi ri vha vhulahe vhaheḓana na vhashai, vha shidzhe vha no ita zwivhuya.

¹⁵ Hone banga ḽi ḓo rema muremi, vhura ha vunḓea.

¹⁶ Makoko a no ḽiwa nga vha fulufhedzeaho, zwi fhira lupfumo lwa vhavhi vhanzhi.

¹⁷ Nungo dza vhavhi dzi ḓo kulea, Muṋe washu Ene u tika vha fulufhedzeaho.

¹⁸ Muṋe washu u londola vha mu shumelaho nga mbilu nthihi; ifa ḽavho ḽi ḓo dzula ḽi hone lini na lini.

¹⁹ Musi muvhi a vha nga shoni; nḓalani vha ḓo ḽa vha laṱa.

²⁰ Vhavhi vhone vha ḓo lovha; maswina a Muṋe washu naho a tshi nga pfulo i tamisaho, vha nyamalala unga vhutsi.

²¹ Muvhi a pamba ha tsha lifha; muvhuya ndi mapakulile, u a ṋea.

²² Vho shudufhadzwaho nga Muṋe washu, shango ḽi ḓo vha ḽavho, vhe a vha teketela vha ḓo lovha.

²³ Muṋe washu u endedza ṋayo dza muthu ane a mu takadza, u a mu tika.

²⁴ Naho a wa, a nga si rambalale; Muṋe washu u a mu vusa.

²⁵ Ndo vha ndi ṅwana, zwino ndo no vha wa maḓuvha; a thi athu vhona mufulufhedzea o laṱiwa kana vhana vhawe vha tshi humbela zwiḽiwa.

²⁶ U ḓi ṋea nga fhedzi, a adzima, vhana vhawe vha ḓi vha na mashudu.

Zwivhuya zwi tshee phanḓa

²⁷ Ṱutshela vhuvhi u ite zwivhuya, ndi hone u tshi ḓo lalama.

²⁸ Muṋe washu u funa khaṱhulo mbuya, vha mu luvhaho nga u fulufhedzea ha vha laṱi, vha ḓo tsireledzwa tshoṱhe; vhana vha muvhi vhone, vha ḓo lovha.

²⁹ Shango ḽi ḓo vha ḽa vha fulufhedzeaho, vha dzula khaḽo lini na lini.

³⁰ Mulomo wa muvhuya u bula a vhuṱali, lulimi lwawe lu amba zwa khaṱhulo mbuya.

³¹ Mulayo wa Mudzimu a u bvi mbiluni yawe, ha pambuwi khawo.

³² Muvhi u lalela muvhuya a tshi ṱoḓa u mu vhulaha.

³³ Muṋe washu ha nga mu kumedzi zwanḓani zwa swina; e tsengoni a nga si haṱulelwe ṱhamu.

³⁴ Fulufhela Muṋe washu u vhulunge milayo yawe, ndi hone a tshi ḓo u hulisa shango ḽa vha ḽau, wa vhona vhavhi vha tshi lovha.

³⁵ Ndo vhona muvhi e na maanḓa, a tshi tou ṋanzwa makole unga muṱulume,

³⁶ hone ndi tshi dovha u fhira ngaho nda wana a si tsheeho, nda ri u mu ṱoḓa nda si mu wane.

³⁷ Vhona a sa solisei, sedza a si na vhufhura: mudziamulalo u ḓo vha na vhaḓuhulu.

³⁸ Hone vhane vha shandukela Mudzimu vha ḓo fhedzwa vhe tshote, vhavhi vha ḓo swielwa.

³⁹ Muṋe washu ndi Ene a tshidzaho vhavhuya, musi wa khombo vha shavhela khae.

⁴⁰ Muṋe washu u a vha farisa a vha lamulela; u vha lamulela kha maswina a vha tshidza, ngauri vha khuda ngae.