DZIPHISALEMA 36 - BIVHILI KHETHWA Mafhungo Madifha

Vhuvhi ha vhathu na vhuthu ha Mudzimu Vho tou ḓikumedzaho vhuvhi

Phisalema ye Dafita mukoma wa Mudzimu a sikela malogwane.

¹ Vhuvhi vhu dzula vhu tshi kweta mbilu ya muvhi, a shandukela Mudzimu a si mu ofhe.

² U a ḓifhura nga murunzi wa ningo; u vhona unga vhutshinyi hawe vhu nga si dzumbuluwe, vhu nga si lifhedzwe.

³ U amba mavhi na a vhufhura fhedzi; ha na vhuṱali, ha iti zwivhuya.

⁴ Naho o lala u ḓi luka vhunwa; ha bvi nḓilani yawe mmbi, vhuvhi ha vhu nyali.

Vhuthu vhuhulu ha Mudzimu

⁵ Muṋe washu, vhuthu hau vhu swika makoleni, u fulufhedzea hau hu ṋanzwa makole.

⁶ Vhuvhuya hau ho hula unga thavha khulu; khaṱhulo dzau ndi dzivha ḽihulu; Iwe Muṋe washu u londola vhathu na phukha.

⁷ Mudzimu, vhuthu hau vhu tamisa hani! Vhathu vha dzumbama nga phapha dzau.

⁸ Vha ḽa mapfura pfamoni yau, u vha nwisa mulamboni wa zwivhuya zwau.

⁹ Ndi Iwe tshisima tsha vhutshilo, ri tshila nga tshedza tshau.

Thabelo ya mufulufheli

¹⁰ U songo vhuya wa ṅaledza vhane vha u ḓivha, u ḓi tonda vha si na vhufhura.

¹¹ U songo tenda vhadzia-u-ḓihudza vha tshi nndevhela kana vhavhi vha tshi nthathela kule.

¹² Vhaitazwivhi ngevhaḽaa vho rambalala, vho tsikeledzwa, vha kundwa u vuwa.