DZIPHISALEMA 35 - BIVHILI KHETHWA Mafhungo Madifha

Thabelo ya u humbela u lamulelwa kha maswina Muṋe washu Mulweli wanga

Luimbo lwa Dafita.

¹ Muṋe washu, imedzana na vha nthomaho, ilwa na vha lwaho na nṋe.

² Fara tshiṱangu na philelo, u ḓe u nndamulele.

³ Ṱomola pfumo ḽau na tsanga u thivhele vha ntovholaho. Amba na nṋe u ri, “Ndi mutshidzi wau.”

⁴ Vhane vha ṱoḓa u ḽa ṱhoho yanga kha vha shone vha tou niwa nga ṱhoni. Vhalaleli vhanga vha humise vha tshi tou fhufhura nḓevhe.

^5-6 Nga vha nge mungu u hwalwaho nga ḓumbu vha tshi vhilimedzwa nga Muruṅwa wa Muṋe washu, nḓila yavho nga i tou nzwii, i redze.

Muruṅwa wa Muṋe washu a tshi vha ruthutha

⁷ Vho nthea nga mambule ndí songo vha levhela, vha ita na u mmveela khunḓa ndi si na tshe nda tshinya.

⁸ Nga vha tshenuwe vho lozwiwa, mambule a fashe murei, khunḓa i fashe muvei.

⁹ A vha nṋe, ndi pembelela Muṋe washu, ndi a takala, o ntshidza.

¹⁰ Ndi amba nga mbilu yanga yoṱhe, ndi ri: Muṋe washu, ndi nnyi ane a nga Iwe? U lamulela muheḓana kha wa maanḓa, mutshinyali wa mu lamulela zwanḓani zwa muṱanguli.

Muthathedzwa

¹¹ Ndi zwifhelelwa nga vhalevhi; ndi sengiswa zwine ndi si zwi ḓivhe;

¹² vha lifhedza zwivhuya nga zwivhi; a thi tshee na ṱhama.

¹³ Hone vhone vha tshi lwala o vha lilisaho ndi nṋe, nda ḓiṅala nda ḓidzima zwiḽiwa, nda rabela ndo kotama,

¹⁴ zwa nga ndi rabelela khonani kana murathu, nda ṱungufhala nda tshimbila ndo kotama, ndó hasha milora ṱhohoni, nda nga muthu a lilelaho mme awe.

¹⁵ Zwino nṋe ndó wela-vho khomboni vha nkuvhanganela vha ntsea. Ndi vho nzhonzhowedzwa nga mifhafhara i sa ḓivhalei, vha ntsasaladza vha dovha.

¹⁶ Vha mmbaisa nga u nkholedza vha dovha, vha tshi tou ntshenganyela na maṋo.

¹⁷ Muṋe wa zwoṱhe, u ḓo sokou ṱanzwa maṱo wa lavhelesa u swika lini? Nndamulele kha vha nndevhelaho, u mponyokise mulomoni wa i ḽaho.

¹⁸ Ndi hone ndi tshi ḓo u livhuha ho kuvhangana tshivhidzo tshoṱhe, nda u khoḓa magogo a tshi zwi pfa.

Maswina a tshi pembela

¹⁹ Maswina anga a sokou mmbenga; u songo a litsha a tshi ḓiphiṋa nga nṋe; u songo tenda vha tshi sinyedzana nga u vhona khombo yanga.

²⁰ A vha ṱoḓi mulalo, tshavho ndi u luka maano a u pomoka vhadziamulalo.

²¹ Vha nkholedza vha ri, “Ahaa, ahaa, ro zwi vhona nga ashu maṱo!”

²² Iwe Muṋe washu, u songo tsha fhumula wó zwi vhona! Muṋe wa zwoṱhe, u songo nndaṱedza!

²³ Takuwa u nndamulele Mudzimu wanga! Muṋe wa zwoṱhe, ima na nṋe!

²⁴ Mudzimu Muṋe wanga, hufha u muhaṱuli muvhuya, u songo vhuya wa tenda vha tshi ntshonedza,

²⁵ vha tshi ri, “Koṱo, koṱo, ro kona!” kana vha ri, “A ro ngo zwizwiedza-ha!”

²⁶ Ngavhe vhane vha takalela u tambula hanga vha tshi shona vha nyadziwa. Vhenevho vha u ḓihudza vha amare ṱhoni vha nyadzee.

²⁷ Avho vhane vha ntsengela nga vha takale vha fhululedze vha ri, “Muṋe washu ndi muhulwane! Ene u takalela zwi tshi nakela mulanda wawe!”

²⁸ Ndi hone ndi tshi ḓo ḓivhadza vhuvhuya hau, nda u renda ḓuvha ḽoṱhe.