DZIPHISALEMA 34 - BIVHILI KHETHWA Mafhungo Madifha

Luimbo lwa u livhuha tsireledzo na mbavhalelo ya Mudzimu Kha ri takale roṱhe!

Luimbo lwa Dafita lwe a sika musi o thathwa nga Abimelekhe nge a ḓipengisa khole.

¹ Ndi ḓo dzula ndi tshi renda Muṋe washu, a thi nga vhuyi nda litsha u mu imbela.

² Muya wanga u zuwa Muṋe washu; vhaheḓana vhoṱhe nga vha thetshelese vha takale.

³ Kha ri hulise Muṋe washu roṱhe! Roṱhe kha ri rende dzina ḽawe!

⁴ Ndo vhidzelela Muṋe washu a nnyaravha, a nndamulela kha zwoṱhe zwine nda zwi ofha.

⁵ Tshifhaṱuwo tsha vhane vha mu sedza tshi a tsha, a vha nga vhuyi vha shona.

⁶ Muheḓana ndi nṋe uno we a vhidzelela Muṋe washu, a mu aravha, a mu tshidza khomboni dzawe dzoṱhe.

⁷ Vha ofhaho Mudzimu, Muruṅwa wa Muṋe washu u vha fhaṱela danga a vha lamukisa khomboni.

⁸ Vhonani uri Muṋe washu u na vhuthu vhungafhani! Vha na mashudu vhane vha dzumbama ngae.

⁹ Inwi no ḓikumedzaho Muṋe washu, mu ofheni! Vhane vha mu ofha a vha shayi tshithu.

¹⁰ Na ndawana dzi a fa nga nḓala, hone vha pfaho Muṋe washu a vha shayi tshivhuya.

Ndayo

¹¹ Vhananga, iḓani ni nthetshelese, ndi ḓo ni funza u hulisa Muṋe washu.

¹² U tama u ḓiphiṋa nga vhutshilo? Wo lavhelela ndalamo na dakalo?

¹³ Ndi zwone, u songo tshinya nga lulimi lwau, u songo ṱanganya mulomo wa nṱha na wa fhasi wa zwifha.

¹⁴ Furalela vhuvhi u ite zwivhuya, lwela mulalo nga mbilu yoṱhe.

¹⁵ Maṱo a Muṋe washu a dzula o sedza vha fulufhedzeaho, u pfa zwililo zwavho.

¹⁶ Tshifhaṱuwo tsha Muṋe washu tshi sinyutshela vhaitazwivhi, vha fa, vha mbo ḓi hangwiwa.

¹⁷ Vha fulufhedzeaho vha tshi vhidzelela Muṋe washu u a vha pfa, a vha ṋula khomboni dzavho dzoṱhe.

¹⁸ Muṋe washu u tsini ha vho kuleaho nungo, u tshidza vha mimuya yo pwashekanaho.

¹⁹ A fulufhedzeaho u welwa nga khombo nnzhi, hone Muṋe washu u mu lamukisa khadzo dzoṱhe.

²⁰ Muṋe washu u tika marambo awe oṱhe, na shambo na ḽithihi ḽa si vunḓee.

²¹ Vhavhi vha ḓo vhulawa nga vhuvhi havho; vha vhengaho muvhuya vha ḓo haṱulelwa ṱhamu.

²² Muṋe washu u tshidza vhalanda vhawe; vhane vha dzumbama ngae a vha nga haṱulelwi ṱhamu.