DZIPHISALEMA 33 - BIVHILI KHETHWA Mafhungo Madifha

Muṋe washu Musiki na Muvhusi Thendo dzi tshi ya ha Muṋe washu

¹ Inwi vha fulufhedzeaho, fhululedzani Muṋe washu! Zwo naka hani vha mbilu dzo ṱambaho vha tshi mu imbela!

² Rendani Muṋe washu nga haripa, mu imbeleni nga haripa ya thale dza fumi!

³ Mu imbeleni luimbo luswa, ni lidze nga vhuṋambi ni tshi ṱavha mukosi no takala.

Maanḓa a ipfi ḽa Muṋe washu

⁴ Ipfi ḽa Muṋe washu ḽi a fulufhedzea; zwi vhonala nga zwoṱhe zwine a ita.

⁵ U funa hu tshi itwa zwi re zwone na zwivhuya; shango ḽo ḓala vhuthu ha Muṋe washu.

⁶ Ḽiṱaḓulu ḽo sikwa nga ipfi ḽa Muṋe washu, ṋaledzi dzaḽo dzoṱhe dzo sikwa nga mufemo wawe.

⁷ O kuvhanganya maḓi a lwanzhe a nga e dzinkhoni; mativha a a shatela zwisikuni.

⁸ Ḽifhasi ḽoṱhe kha ḽi ofhe Muṋe washu, vhathu vhoṱhe nga shango kha vha mu tetemele.

⁹ O amba zwa vha hone, a laela zwa ima zwo khwaṱha.

Nzudzanyo ya Muṋe washu i sa tseki

¹⁰ Muṋe washu u piringanya vhutande ha dzitshakha, u phusukanya vhukwila he vha dzudzanya.

¹¹ Nzudzanyo ya Muṋe washu a i tseki lini na lini, mbofho dzawe dzi ya nga mirafho na mirafho.

¹² Lu na mashudu lushaka lune Mudzimu walwo a vha Muṋe washu, ndi vhathu vhe a vha nanga u vha vhawe vhukuma.

Muṋe washu Muvhonazwoṱhe

¹³ Muṋe washu u lavhelesa fhasi e ṱaḓulu, a vhona vhathu vhoṱhe;

¹⁴ u vhusa o dzula kha khuluṋoni yawe a tshi sedza vhathu vhoṱhe vha ḽifhasi.

¹⁵ Ndi Ene Muvhumbi wa mbilu dzoṱhe; u ṱalukanya zwoṱhe zwine vha ita.

¹⁶ Khosi a i tshidzwi nga vhuhulu ha mmbi yayo, na muhali ha tinyi nga maanḓa awe;

¹⁷ bere ya nndwa a si yone i kundaho; na maanḓa áyo a i koni u tshidza.

¹⁸ Muṋe washu u londota vha mu ofhaho, vhane vha fulufhela lufuno lwawe lu sa dzinginyei,

¹⁹ uri a vha tshidze lufuni, a ḓi vha fusha naho hu nḓalani.

Muṋe washu fulufhelo ḽashu

²⁰ Riṋe ri lindela Muṋe washu, Mutiki washu na Tshiṱangu tshashu;

²¹ mbilu dzashu dzi takalela Ene, tshine ra fulufhela ndi dzina ḽawe ḽikhethwa.

²² Muṋe washu, ngavhe u tshi ḓi ri funa nga lufuno lwau lu sa dzinginyei, lwonolwo lwe ra lu fulufhela.