DZIPHISALEMA 32 - BIVHILI KHETHWA Mafhungo Madifha

Dakalo ḽa o hangwelwaho

Tshirendo tsha Dafita.

¹ Mashudu we a hangwelwa vhutshinyi, we vhukhakhi hawe ha fukedzwa.

² Wa mashudu ndi uyo ane Muṋe washu a si tsha mu vhalela milandu, a si na vhufhura mbiluni.

³ Nṋe ndo ri ndi sa athu bula vhutshinyi hanga nda lwala lwe nda tou honḓa ḓuvha ḽoṱhe;

⁴ tshanḓa tshau tsho nnziamedza vhusiku na masiari, nda fhelelwa nga nungo unga murongwe u tshi fhufha nga biso tshilimo.

⁵ Ndi hone ndi tshi bula vhutshinyi hanga, ndi si tsha dzumba mulandu wanga. Ndo ri, “Ndi ḓo bulela Muṋe washu vhukhakhi hanga,” Iwe wa nkhangwela mulandu wa vhutshinyi hanga.

⁶ Vhalanda vhau vha fulufhedzeaho vhoṱhe nga vha rabele Iwe-ha u tshi kha ḓi wanala. Muḓalo wa maḓi ó sinyuwa u tshi ḓa, u nga si swike khavho.

⁷ Iwe u vhudzumbamo hanga; u a ntsireledza ndi si welwe nga khombo. Wo ntshidza, ndo no tangwa nga mifhululu.

⁸ Litshani ndi ni laye, ndi ni sumbedze nḓila ine na ḓo i fara, ndi ni eletshedze ndi ni londote:

⁹ Ni songo nga bere, ni songo ḓiita meila ine ya langwa nga muhala na dziḓomo uri i ye hune wa funa.

¹⁰ Vhavhi vha welwa nga khombo nnzhi, hone vha fulufhelaho Muṋe washu vha tsireledzwa nga lufuno lu sa dzinginyei.

¹¹ Inwi vha fulufhedzeaho, pembelelani Muṋe washu, inwi noṱhe vha si na vhufhura, lidzani mifhululu.