DZIPHISALEMA 31 - BIVHILI KHETHWA Mafhungo Madifha

Fulufhelo ḽa mutovholwa Mutovholwa: Thabelo yawe i sumbedzaho fulufhelo

Phisalema ya Dafita ye a sikela malogwane.

¹ Muṋe washu, ndi khuda nga Iwe, u songo vhuya wa tenda ndi tshi shoniswa; hufha u tshi fulufhedzea, nndamulele!

² Mpfe, u si lenge u nndamukisa! Ivha bako ḽanga ḽine nda khuda khaḽo, ivha nnḓu ine nda dzumbama khayo, ndi hone ndi tshi ḓo tshila.

³ Ndi ngoho, u bako ḽanga, u dzhavhelo ḽanga, nnyendedze-ha u nndededze, hufha u Mudzimu wanga.

⁴ Mponyokise mambuleni e vha nthetshela, hufha u vhushavhelo hanga.

⁵ Ndo kumedza muya wanga zwanḓani zwau; Muṋe washu, wo ntshidza, Iwe Mudzimu a fulufhedzeaho.

⁶ Ndi vhenga vhane vha luvha midzimu i si tshithu, hone nṋe ndi fulufhela Iwe Muṋe washu.

Thendo yawe

⁷ Wo vhona u tambula hanga wa ḓivha vhuṱungu ha muya wanga; ndi ḓo takala nda pembelela lufuno lwau lu sa dzinginyei.

⁸ A wo ngo nkumedza zwanḓani zwa maswina, wo mmbofholola, ndi vho kona u fema.

Mulaṱwa: Tshaavhuyo

⁹ Muṋe washu, nkhathutshele, ndo hanganea! Maṱo anga o punda nga miṱodzi, ndo kulekana miraḓo tshoṱhe,

¹⁰ vhutshilo hanga ho fheṱwa nga mbiluvhuṱungu, vhutshilo hanga ho fhungudzwa nga u ḽa mbilu, maanḓa anga o fhedzwa nga milandu yanga, na marambo anga o ṋoka.

¹¹ Maswina anga oṱhe a a nnyadza, zwihulu vhahura vhanga; khonani dzi vho nnyita dada; vha ṱanganaho na nṋe nḓilani vha a shavha.

¹² Ndo no tou hangwiwa sa o faho, ndi vho nga mudzio wo pwasheaho;

¹³ maswina a ṱolou ntshushedza, nyofho dzo tou ntanga nga hoṱhe; ndi khou langanwa, vha luka maano a u mmbulaha.

Thabelo yawe i sumbedzaho fulufhelo

¹⁴ Hone nṋe ndi fulufhela Muṋe washu, ndi ri, “U Mudzimu wanga.”

¹⁵ Zwine nda ṱangana nazwo ḓuvha ḽiṅwe na ḽiṅwe zwi langwa nga Iwe; nndamulele zwanḓani zwa maswina anga, na zwanḓani zwa vhoṱhe vha ntovholaho.

¹⁶ Hufha ndi mulanda wau, ntsedze nga vhuthu; hufha lufuno lwau lu sa dzinginyei, ntshidze!

¹⁷ Muṋe washu, ndo u vhidzelela, u songo tenda ndi tshi shoniswa, kha hu shoniswe vhavhi, nga vha valwe milomo nga tshalo!

¹⁸ Milomo yavho kha i shatelwe, i zwifhelela vha si na mulandu nga u ḓihudza na luswetho na u sasaladza.

Thendo

¹⁹ Vhuthu hau ho hula hani! U dzula u tshi tonda vha u ofhaho na vhoṱhe vha khudaho nga Iwe, uri vhathu vhoṱhe vha zwi vhone.

²⁰ U vha dzumba tsini-tsini hau hu si na vhukwila ha vhathu, wa vha vhea he vha tsireledzea, vha si tsha ḓo seṅwa.

²¹ Muṋe washu nga a rendwe; o ntsumbedza lufuno lu kanukisaho zwiḽa ndo tingwa unga muḓi wó govhelwa.

²² Ndo vha ndo tshenuwa nda ri, “Ndo fhandekanywa na Iwe, ndo lovha!” Hone Iwe wo pfa mukosi wanga wa nndamulela.

²³ Funani Muṋe washu noṱhe inwi vhalanda vhawe vha fulufhedzeaho! Muṋe washu u vhulunga vha na ngoho, ngeno vha u ḓihudza a tshi vha lifhedza zwihulu.

²⁴ Imani no khwaṱha ni sa neti noṱhe inwi ni fulufhelaho Muṋe washu.