DZIPHISALEMA 30 - BIVHILI KHETHWA Mafhungo Madifha

Tshililo tsho ri u fhela ha pembelwa Muṋe washu Muphalali

Phisalema ya Dafita ye a sikela u hangulwa ha thembele.

¹ Muṋe washu, ndi a u renda; wo nṋula khomboni, wa si tende maswina anga a tshi ḓiphiṋa nga nṋe.

² Mudzimu Muṋe wanga, ndo u ṱavhela mukosi wa mphodza.

³ Muṋe washu, wo nṋula vhudzulavhafu; ndo vha ndo fara i yaho tshaloni, wa dovha wa nṋea vhutshilo.

⁴ Inwi vhalanda vha Muṋe washu vha fulufhedzeaho, mu rendeni nga nyimbo; mu livhuheni, ni elelwe vhukhethwa hawe.

⁵ Mbiti dzawe a dzi kovhedzi ḓuvha, vhuthu hawe hone a vhu gumi. Ḽi tshi kovhela hu rothiswa miṱodzi, ḽi tshi tsha ha lila mifhululu.

Vhutsilu ha mazuwo

⁶ Zwiḽa zwi tshi nnyanḓa ndo ri, “Ndi ḓo ima ndo khwaṱha lini na lini.”

⁷ Muṋe washu, wo vha wo nkhwaṱhisa nga vhuthu hau nda nga thavha i sa tseki; hone u tshi vho mpfuralela zwa nkula nungo.

⁸ Muṋe washu, ndo u ṱavhela mukosi, nda ri, “Muṋe wanga, nkhathutshele!

⁹ Ndá fa zwi ḓo u farisani? U ḓo vhuelwa ngani ndi tshi swiṱwa? U ḓo rendwa nga buse naa? Luruli lu nga ṱanziela u fulufhedzea hau naa?

¹⁰ Muṋe washu, nthetshelese u nkhathutshele! Muṋe washu, nndamulele!”

U pembela

¹¹ Tshililo tshanga wo tshi shandula dakalo; wo mmvula madzanganda a zwililo wa nnyambadza dakalo.

¹² Zwino a thi tsha ḓo fhumula, ndi ḓo u renda nga nyimbo. Mudzimu Muṋe wanga, ndi ḓo u livhuha lini na lini.