DZIPHISALEMA 3 - BIVHILI KHETHWA Mafhungo Madifha

Thabelo ya nga matsheloni ya u humbela u lamulelwa nga Mudzimu Vhuswina ha vhathu

Phisalema ya Dafita zwiḽa o shavha ṅwana wawe Abisalomo.

¹ Muṋe washu, vhona uri maswina anga o anda hani! Ndi vhanzhi vha mmvutshelaho,

² a si vhaṱuku vhane vha tshi nnyamba vha ri, “Mudzimu a nga si mu lamulele.”

Tsireledzo ya Mudzimu

³ Hone Iwe Muṋe washu u tshiṱangu tsha u mpilela: vhugala hanga ndi Iwe, ndi Iwe u mmbeaho maṱhakheni.

⁴ Ndi ṱavhela Muṋe washu mukosi, a mpfa e thavhani yawe khethwa.

U rudza mbilu

⁵ Ndi lala fhasi nda eḓela, nda dovha nda vuwa; ndi tikwa nga Muṋe washu.

⁶ Tshakha dzine dza nndia dzi tshi bva thungo dzoṱhe, a thi nga dzi ofhi na u ḓala hádzo.

Gundo na mashudu

⁷ Takuwa Muṋe washu! Mudzimu wanga, iḓa u ntshidze! Hufha u tshi ḓi bomodza maswina anga, vhavhi u tshi ḓi vha kula maṋo.

⁸ U tshidza hu bva kha Iwe Muṋe washu. Dzula u tshi ḓi shudufhadza vhathu vhau.