DZIPHISALEMA 29 - BIVHILI KHETHWA Mafhungo Madifha

Muṋe wa maḓumbu Thendo ṱaḓulu

Phisalema ya Dafita.

¹ Rendani Muṋe washu, hee inwi vhahulwane vha re ṱaḓulu, rendani Muṋe washu wa vhugala na maanḓa!

² Rendani dzina ḽa Muṋe washu ḽa vhugala, luvhani Muṋe washu a tshi vhonadza lupenyo lwawe lukhethwa.

Muṋe washu a tshi amba e kha ḓumbu

³ Ipfi ḽa Muṋe washu ḽi pfala lwanzheni, Mudzimu wa vhugala u a bvuma e ngindii, Muṋe washu u dzula nṱha ha maḓi mahulu.

⁴ Ipfi ḽa Muṋe washu ḽi na maanḓa, ipfi ḽa Muṋe washu ḽi na vhugala.

⁵ Ipfi ḽa Muṋe washu ḽi fhandula mikedara, Muṋe washu u fhandula mikedara ya Libanoni.

⁶ U ritha Thavha ya Libanoni ya khana sa ṋamana, Thavha ya Heremoni ya fhufha sa ṋari.

⁷ Ipfi ḽa Muṋe washu ḽá pfala hu vhenge ha bva khavhu.

⁸ Ipfi ḽa Muṋe washu ḽi dzinginyisa masoga, Muṋe washu u dzinginyisa phanga dza Kadeshe.

⁹ Ipfi ḽa Muṋe washu ḽá pfala tholo dzi a dzwala, ḽi ṱangula maṱaka ha sala he swoto, hone thembeleni yawe ha pfala mifhululu vha ri, “Thendo!”

Mashudu a vhathu vha Mudzimu

¹⁰ Muṋe washu u vhusa ó thukha kha mativha mahulu, Muṋe washu u ḓo ḓi vhusa e khosi lini na lini.

¹¹ Muṋe washu u ḓo ṋea vhathu vhawe nungo, Muṋe washu u ḓo shudufhadza lushaka lwawe ḽa lala.