DZIPHISALEMA 27 - BIVHILI KHETHWA Mafhungo Madifha

Tshedza tshanga, Mutshidzi wanga! U khuda nga Muṋe washu

Phisalema ya Dafita.

¹ Muṋe washu ndi tshedza tshanga, Mutshidzi wanga ndi Ene, ndi kha ḓi ofha nnyi? Muṋe washu ndi dzhavhelo ḽanga, ndi kha ḓi tshenuwa nnyi?

² Maswina anga na vhavhi vha lwaho na nṋe vha tshi nndodela vha tshi ri vha mponde, vha ḓo khukhulwa vha wa.

³ Naho gomane ya ntinga mbilu yanga a i nga ofhi, naho nda diwa nga mmbi ndi ḓo fulufhela ndo khwaṱha.

U ṱulutshela pfamo ya Mudzimu

⁴ Ndi tshithihi fhedzi tshine nda humbela Muṋe washu; tshine nda lila ndi tshithihi fhedzi: ndi u dzula pfamoni ya Muṋe washu maḓuvha oṱhe a vhutshilo hanga, ndi tshi takadzwa nga Muṋe washu ndi tshi mu elekanya thembeleni yawe.

⁵ U ḓo ntsireledza musi muvhi, a nnzumba pfamoni yawe, a nnyimisa nṱha ha tombo.

⁶ Ndi hone ndi tshi ḓo imisa ṱhoho nda vhona maswina anga o ntingaho e fhasi-fhasi, nda konou ṋekedza zwiṱhavhelo pfamoni yawe ho ṱangana mifhululu ya dakalo; ndi ḓo imba nda renda Muṋe washu.

U ṱuvha Muṋe washu

⁷ Muṋe washu, ipfa ndi tshi u vhidzelela! Nkhathutshele u mphindule!

⁸ Ndi elelwa zwe wa nndaya u tshi ri, “Iḓa u nnduvhe.” Ndi zwone: ndi ḓo ḓa nda luvha Muṋe washu,

⁹ u songo nnzumbama, u songo ntsinyutshela wa nkhumisa; hufha wo ḓi vha Mulamuleli wanga; Mudzimu Mutshidzi wanga, u songo nṱamba, u songo nndaṱa.

¹⁰ Naho khotsi anga na mme anga vha nga nndaṱa, Iwe Muṋe washu u ḓo nkuvhatedza.

U khuda nga Muṋe washu

¹¹ Muṋe washu, mpfunze nḓila dzau, u ntshimbidze nga nḓila-nḓila; ndi na maswina.

¹² U songo nkumedza one; ṱhanzi dza u zwifha dzo mmvutshela, vha amba a u nkhuvhadza.

¹³ Ngavhe ndi si fulufhele uri ndi ḓo vhona vhuthu ha Muṋe washu ndi tshi kha ḓi tshila ... a thi tsha ḓivha!

¹⁴ Lindela Muṋe washu, ima u khwaṱhe, u songo kulea nungo, lindela Muṋe washu!