DZIPHISALEMA 26 - BIVHILI KHETHWA Mafhungo Madifha

Thabelo i bvaho mbiluni yo ṱambaho

Phisalema ya Dafita.

¹ Ntsengele Muṋe washu, a thi na mulandu, ndo fulufhela Muṋe washu ndi sa tseki.

² Muṋe washu, edzou nṱola u nndinge; sedzulusa mbilu yanga na muhumbulo wanga.

³ Hufha vhuthu hau vhu tshi nnyendedza; u fulufhedzea hau hu a nndededza.

⁴ A thi anḓani na vhadziamuhoyo, a thi pfani na vha tshiṱavhatsindi.

⁵ Ndi nengwa tshikungo tsha vhaitazwivhi, vhavhi ndi a vha tinya.

⁶ Ndo ṱamba zwanḓa, thi na mulandu. Ndi mona na aḽiṱari ya Muṋe washu,

⁷ nda imba luimbo lwa ndivhuho ndi tshi bula mishumo yawe mihulu.

⁸ Muṋe washu, pfamo yau ndi i funa hani! Hune ra vhona vhugala hau hu ntakadza hani!

⁹ U songo nndozwa na vhatshinyi, u songo mpaṱekanya na vha shululaho malofha,

¹⁰ vhathu vhane zwanḓa zwavho zwa dzulela u ita vhuvhi, vhathu vha tshanḓanguvhoni.

¹¹ A vha nṋe ndi a fulufhedzea; nnyitele tshilidzi u ntshidze!

¹² Asizwo! Ndo ima hu si na tshi ofhisaho, ndi renda Muṋe washu tshivhidzoni tsha vhathu vhawe.