DZIPHISALEMA 25 - BIVHILI KHETHWA Mafhungo Madifha

U humbela u hangwelwa na u lamulelwa

Phisalema ya Dafita.

¹ Ndi takusela mbilu yanga ha Iwe, Muṋe washu.

² Mudzimu wanga, ndi fulufhela Iwe, u songo tenda ndi tshi shoniswa; maswina anga a songo ri, “Koṱo!”

³ Vhukuma vha lavhelelaho Iwe a vha nga shoni; hu ḓo shona vha sa fulufhedzei vha no u shandukela.

⁴ Muṋe washu, nnḓivhadze nḓila dzau, u mpfunze u ita zwine wa funa.

⁵ Mpfunze ngoho yau i nndededze; u Mudzimu wanga, u a ntshidza, ndi ṱwa ndo u ṱulutshela.

⁶ Muṋe washu, u songo hangwa u nnyitela tshilidzi, hufha lufuno lwau lu sa dzinginyei lini na lini.

⁷ Nkhangwele vhutshinyi na vhuvhi ha hana hanga, Muṋe washu, nnyelelwe nga lufuno lu sa dzinginyei na vhuthu.

⁸ Muṋe washu ndi muvhuya, u a fulufhedzea; na vhatshinyi u vha funza nḓila ya ngoho.

⁹ Vha ḓiṱukufhadzaho u vha funza u ita zwine a funa, a vha tshimbidza nḓilani ya ngoho.

¹⁰ Vhane vha vhulunga mulanga wa Muṋe washu vha tevhedza ndaela dzawe, u a vha endedza nga vhuthu, u a fulufhedzea.

¹¹ Muṋe washu, nkhangwele vhutshinyi hanga naho vhu vhuhulu, u tshi itela dzina ḽau!

¹² Munna a ofhaho Muṋe washu ndi nnyi? Onoyo u ḓo sumbedzwa nḓila ine a ḓo i fara,

¹³ a ḓo kona u tshila zwi tshi mu anḓa, shango ḽa vha ifa ḽa vhana vhawe.

¹⁴ Muṋe washu u konana na vhane vha mu ofha; vhenevho u vha dzumbululela mulanga wawe.

¹⁵ Ndi dzula ndo lavhelesa Muṋe washu; u ḓo fashulula milenzhe yanga mambuleni.

¹⁶ Nndavhelese u nkhathutshele; ndi ndoṱhe, thi na vhuyo;

¹⁷ rula mbilu yanga muhwalo, ndi si tsha ofha.

¹⁸ Sedza vhuṱungu na u tambula hanga, u nkupule vhutshinyi.

¹⁹ Vhona uri maswina anga o anda hani, vhona uri vha mmbenga hani!

²⁰ Nndondole u ntshidze, u songo tenda ndi tshi shoniswa, hufha ndi tshi khuda nga Iwe.

²¹ Vhuthu hanga na u fulufhedzea nga zwi nndondole, hufha ndo lavhelela Iwe!

²² Mudzimu, tshidza Israele khomboni dzoṱhe.