DZIPHISALEMA 24 - BIVHILI KHETHWA Mafhungo Madifha

Khosi ya vhugala Musikazwoṱhe

Phisalema ya Dafita.

¹ Shango ḽoṱhe u ya he ḽa guma, ḽifhasi na zwi re khaḽo, zwoṱhe ndi zwa Muṋe washu.

² Ndi Ene we a ḽi tea nṱha ha malwanzhe, ndi Ene we a ḽi vhea nṱha ha maḓi mahulu.

Mukhethwakhethwa

³ Ndi nnyi o teaho u gonya thavha ya Muṋe washu? Ndi nnyi ane a nga ima fhethu hawe hukhethwa?

⁴ Ndi uyo wa zwanḓa zwi si na tshika, wa mbilu yo ṱambaho, i nengwaho vhumbulu, a sa ani a tshi zwifha.

⁵ Ndi ene ane a ḓo shudufhadzwa nga Muṋe washu, a ṋewa zwo mu fanelaho nga Mudzimu Mutshidzi wawe.

⁶ Ndi vhone vha no ṱoḓa u dzula na Mudzimu, vha no lila u mu vhona; ndi vhone vhana vha Jakopo.

Mukundavhoṱhe

⁷ Hee inwi dzikhoro, aṱamani! Vuleani inwi mahothi a kale-kale, hu dzhene Khosi ya vhugala!

⁸ Nṋa “Khosi iyo ya vhugala” ndi nnyi? Ndi Muṋe washu, Ene Muhali Ramaanḓa, Muṋe washu Muhali nndwani.

⁹ Hee inwi dzikhoro, aṱamani! Vuleani inwi mahothi a kale-kale, hu dzhene Khosi ya vhugala!

¹⁰ Nṋa “Khosi iyo ya vhugala” ndi nnyi nandi? Ndi Muṋe washu Mukundavhoṱhe, ndi Ene Khosi ya vhugala.