DZIPHISALEMA 22 - BIVHILI KHETHWA Mafhungo Madifha

U tambudzwa na u tshidzwa ha a fulufhelaho Mudzimu Maanḓa a vhavhi na tshiṱuhu tshavho

Phisalema ya Dafita ye a sikela malogwane; i pfi i imbiwe nga kuimbele kwa luimbo lune lwa ri “Tholo ya mutsho”.

¹ Mudzimu wanga, Mudzimu wanga, wo nndaṱelani? Na u gomela hanga khe u sa ntshidzi?

² Yawee Mudzimu wanga, masiari ndi vhidzelela u si nnyaravhe, vhusiku nda lila wa si nnyawedze.

³ Hufha Iwe u mukhethwa, khuluṋoni yau i thendo dza Israele.

⁴ Vhokhotsi ashu vho vha vha tshi ḓitika nga Iwe, vho fulufhela Iwe, Iwe wa vha tshidza;

⁵ vho u ṱavhela mukosi, Iwe wa vha phalala; a vho ngo sokou u fulufhela vha fhedza vha shona.

⁶ A vha nṋe, a thi tshee muthu, ndi tou vha mbungu; ndi goḓwa nga vhathu, vhoṱhe vha a nnyadza.

⁷ Vhoṱhe vhane vha mmbona vha a nkolela, vha sokou nkongomedza vha dzungudza dziṱhoho;

⁸ vha ri, “Mafhungo awe o a kumedza Yahavee, zwino nga' mu tshidze-ha, nga' mu lamukise-ha vhunga a tshi mu funa!”

⁹ Ndi Iwe we wa nṋula thumbuni ya mme anga, wa nthudza mbilu nga maḓamu avho.

¹⁰ Ndi tshi bebwa ndo ḓi tou kumedzwa Iwe, tshee nda bebwa Mudzimu wanga o ḓi vha Iwe.

¹¹ U songo nṱutshela, khakhathi i tou vha muṋangoni; a hu na muṅwe ane a nga mpfarisa.

¹² Ndo tingwa nga mboho nnzhi, maboho a Bashani o ntangela ngomu.

¹³ Ndo ita na u semelwa maṋo, unga ndau i vhombaho i tshi khou ponda.

¹⁴ Ndo tou tevhulelwa kule sa maḓi, na zwiendanungo zwanga zwo lunguluwa; mbilu yanga yo ṋoka sa phula, yo tou pwaṱa ngomu khanani yanga.

¹⁵ Maanḓa anga o fhela, ndo no tou vha gamba, lulimi lwanga lwo nambatela marenuni, Iwe u ntsumbudza buseni nda nga mufu.

¹⁶ Mmbwa na dzone dzo ntinga, ndo thathedzwa nga tshigwada tsha vhavhi, vho rumbula zwanḓa zwanga na ṋayo dzanga,

¹⁷ na mbabvu dzanga dzi nnḓa; vha tou zwondolola vhe koṱo,

¹⁸ vha kovhekana zwiambaro zwanga, lupila lwanga lwone vha lu itela mamvaṱe.

¹⁹ Zwino-ha Iwe Muṋe washu, u songo ima ngeo kule, ṱavhanya u mpfarisa Iwe maanḓa anga!

²⁰ Nndamukise ndi si rungwe nga pfumo; nda vhulawa nga dzimmbwa ndi nga dovha nda tshila naa?

²¹ Nndamukise mulomoni wa i ḽaho, vhunga wo ntshidza ndí ṋangani dza ṋari!

Thabelo i tshi fhindulwa

²² Vha hashu ndi ḓo vha anetshela zwe wa nnyitela; ndi ḓo u renda tshivhidzo tsho kuvhangana.

²³ Rendani Muṋe washu inwi ni mu ofhaho, mu huliseni inwi vhana vha Jakopo, tetemelani Ene noṱhe vhana vha Israele;

²⁴ ho ngo nyadza muheḓana, vhushai hawe ho ngo vhu nengwa, ho ngo mu furalela, o mu pfa a tshi mu lilela.

²⁵ Ndi tshi u renda tshivhidzoni tshihulu ndi vha ndo tou ṋewa nga Iwe; zwe nda u anela ndi ḓo zwi ita vha u ofhaho vha tshi zwi vhona.

²⁶ Vhaheḓana vha ḓo ḽa vha fura zwiṱhavhelo; Muṋe washu u ḓo rendwa nga vha mu ṱoḓaho; ngavhe ni tshi ḓi khwaṱha lini na lini.

²⁷ Ḽifhasi nga he ḽa guma ḽi ḓo mu elelwa, ḽi ḓo rembulutshela ha Muṋe washu; tshakha dzoṱhe dza shango dzi ḓo mu gwadamela.

²⁸ Muvhuso ndi wa Muṋe washu; muvhusi wa dzithakha ndi Ene.

²⁹ Madendele a ḽifhasi a ḓo ḓa-vho munyanyani wawe a mu gwadamela, na vhoṱhe vha re tsini na u fa, vha sa koni u ḓitshidza, vha ḓo gwadama phanḓa hawe.

³⁰ U ḓo shumelwa na nga zwiḓuhulu; Muṋe wa vhoṱhe u ḓo anetshelwa mirafho i ḓaho.

³¹ Vhuvhuya hawe vha ḓo vhu ḓivhadza na vha sa athu bebwa. Vha ḓo ri zwo itwa nga Ene.