DZIPHISALEMA 18 - BIVHILI KHETHWA Mafhungo Madifha

U livhuha Mudzimu we a kunda maswina a Dafita Muṋe washu ndi vhushavhelo

Phisalema ya Dafita mukoma wa Muṋe washu ye a sikela malogwane. Luimbo holu o lu imbela Muṋe washu musi o mu ponyokisa zwanḓani zwa maswina awe oṱhe na zwanḓani zwa Saulo.

¹ Ndi u funa hani Muṋe washu, maanḓa anga ndi Iwe.

² Muṋe washu ndi vhukhudo hanga, ndi dzhavhelo ḽanga, ndi Mutshidzi wanga, Mudzimu wanga, bako ḽanga, Ene ane nda khuda ngae, ndi Ene tshiṱangu tshanga, pfumo ḽi nndwelaho, hone vhushavhelo hanga luwani.

³ Muṋe washu ndi ḓi mu vhidzelela ndó welwa nga maswina, a ntshidza, nga hu khoḓwe Ene.

Dafita a tshi lamukiswa

⁴ Ndo vha ndo tandedzwa nga mambule a lufu, ndó khakhedzwa nga tshirulu tsha ndozwo.

⁵ Ndo vha ndo tandedzwa nga mambule a vhudzulavhafu, ndó livhana na milavhu ya lufu,

⁶ nda ḓi vhidzelela Muṋe washu ndo khakhedzwa, Mudzimu wanga nda mu ṱavhela mukosi, Ene a pfa ipfi ḽanga e pfamoni yawe, mukosi wanga wa swika nḓevheni dzawe.

⁷ Zwenezwo shango ḽa dzinginyea ḽa tetemela, miteo ya dzithavha ya tseka-tseka, ya dzinginyea ó sinyuwa;

⁸ ningoni dzawe ha duba vhutsi, mulomoni ha bva khavhu dza vhuhali, a pfela masimbe a mulilo fhasi;

⁹ lutombo a lu peta a tsela fhasi, swiswi ḽitswu-ḽitswu ḽí fhasi ha ṋayo dzawe;

¹⁰ a fhufha ó namela mukherube, a tengama nga phapha dza muya,

¹¹ a dzhia swiswi a fuka ḽone, thumba yawe e makole matswu a mvula,

¹² phanḓa hawe he vhenge, makole awe a shulula tshifhango na masimbe,

¹³ Muṋe washu a ritha mubvumo ṱaḓulu he ngindii, Waṱaḓuluṱaḓulu a mbo ṱahisa ipfi ḽawe ha shuluwa tshifhango na masimbe a mulilo,

¹⁴ a posa misevhe yawe a vha balanganya, a thathabisa nḓadzi dzawe vha shavha vhó ḓaḓa.

¹⁵ Zwenezwo miedzi ya lwanzhe ya sala nnḓa miteo ya ḽifhasi ya sala khagala u tshi vha kaidza Iwe Muṋe washu, hu tshi tita muya u bvaho ningoni dzau.

¹⁶ Muṋe washu a onyolosa tshanḓa e ngei ṱaḓulu, a ntakula a nṋula mikumbelani,

¹⁷ a nndamukisa zwanḓani zwa swina ḽanga ḽa maanḓa na vha mmbengaho, ngauri nṋe ndo vha ndi nga si vha kone.

¹⁸ Vho nnzhongondedza ndó welwa nga zwo vhifhaho, hone nda tou fa Muṋe washu,

¹⁹ Ene a nṋula vhukati havho. O ntshidza ngauri u a mpfuna.

Muṋe washu u a fulufhedzea

²⁰ Muṋe washu o mpfufha nga zwo fanelaho a no fulufhedzea, a nṋea zwo fanelaho a si na mulandu,

²¹ ngauri ndo tevhedza nḓila dza Muṋe washu, a tho ngo tenda vhuvhi vhu tshi mphandekanya na Mudzimu wanga.

²² Milayo yawe yoṱhe a i ṱuwi mbiluni yanga, zwe a laya a tho ngo zwi sendedza kule;

²³ Ene muṋe o vhona ndi sa solisei, tshanga ho ḓi vha u ofha u khakha.

²⁴ Ndi zwe Muṋe washu a mpfufha nga zwo fanelaho a no fulufhedzea, nge a vhona ndi si na mulandu.

²⁵ Vha vhuthu Iwe u ḓi vha itela-vho vhuthu; a sa solisei u mu pfufha nga zwi sa solisei;

²⁶ vha mbilu dzo ṱambaho vha wana na Iwe u na mbilu tshena, hone vhadziavhumbulu vha wana u swina.

²⁷ Iwe u tshidza vha ḓiṱukufhadzaho, wa ṱukufhadza vha u ḓihudza.

²⁸ Muṋe washu, ndi Iwe une wa ntshidza, zwa nga wo mpfungela luvhone wa pandela swiswi ḽo ntibaho, Iwe Mudzimu wanga.

²⁹ Ndí na Iwe ndi wela mmbi nga pfumo, ndí na Mudzimu wanga ndi fhufha mitsheṱo.

U kunda nga maanḓa a Mudzimu

³⁰ Ndi Ene Mudzimu a sa khakhi, ḽine a amba ḽi ḓi wanala ḽi ngoho. Ndi Ene tshiṱangu tsha vhoṱhe vhane vha khuda ngae.

³¹ Nṋa hone Mudzimu ndi nnyi arali e si Ene Muṋe washu? Bako ḽa vhudzumbamo hashu ndi nnyi arali e si Mudzimu washu?

³² Ndi Ene Mudzimu we a nnyambadza nungo, nda tshimbila ndi sa khukhulwi.

³³ U mpha luvhilo lwa phala, na nṱha ha thavha a thi khukhulwi.

³⁴ Zwanḓa zwanga u zwi gudisa nndwa, zwa khwaṱha nda akha vhura ha tsimbi tswuku.

³⁵ U tshidzwa nga Iwe ndi tshone tshiṱangu tshanga, u ntika nga tshanḓa tshau tsha maanḓa, wo nṋea vhuhulwane nga vhuthu hau.

³⁶ Ṋayo dzanga wo dzi ṋea vhukando, nda sa redzemuwe.

³⁷ Maswina anga ndo a pandamedza nda a fara, nda sa vha humele vha sa athu fhela vhoṱhe.

³⁸ Ndo vha sukekanya vha si tsha vuwa, nda vha kandekanya nga ṋayo dzanga.

³⁹ Wo mpha maanḓa a u dzhena nndwa, maswina anga wa a susumedza nga fhasi ha ṋayo dzanga.

⁴⁰ Wo ita uri maswina anga a mphe zwitiko, nda fhedza vhoṱhe vhe vha vha vha tshi mmbenga.

⁴¹ Vho ṱavha mukosi vha shaya mulamuleli, vha vhidzelela Muṋe washu a si vha aravhe,

⁴² nda vha phusukanya sa buse ḽi hwalwaho nga ḓumbu, nda vha kudza nnḓa vha nga lurofhe nḓilani.

⁴³ Iwe wo nndamukisa vhathu vha tshi mmvutshela, wa mmbumba yone ṱhoho ya dzitshakha, nda luvhiwa na nga vhane ndi si vha ḓivhe.

⁴⁴ Vho ri u pfa bvumo ḽanga vha mbo ḓi ḓa vha luvha, vhatsinda vha ḓa vha khotha,

⁴⁵ vha kulea miraḓo, vha bva mitsheṱoni yavho vha tshi tou khura nga nyofho.

Kha hu rendwe Muṋe washu!

⁴⁶ Muṋe washu u a tshila! Kha hu rendwe Ene bako ḽanga ḽa u khuda, nga hu huliswe Ene Mudzimu a ntshidzaho,

⁴⁷ Ene we a mpha maanḓa a u ḓilifhedzela, dzitshakha a dzi ita vhalanda vhanga,

⁴⁸ a nndamukisa zwanḓani zwa vha mmbengaho. Ee, ndi Iwe we wa nṋea vhuhulwane nda fhira maswina anga, vhalevhi vha tshi mmvutshela wa ntshidza.

⁴⁹ Muṋe washu, ndi zwine nda ḓo u renda vhukati ha dzitshakha, ndi ḓo renda dzina ḽau nga luimbo.

⁵⁰ Khosi ye wa i ta wa i sumbedza lufuno lu sa dzinginyei, ya kunda maswina tshoṱhe – ene Dafita na vhaḓuhulu vhawe, zwino na lini na lini.