DZIPHISALEMA 17 - BIVHILI KHETHWA Mafhungo Madifha

Thabelo ya mupomokwa a si na mulandu Luvalo lwo ṱambaho

Thabelo ya Dafita.

¹ Muṋe washu mpfe! Hufha ndi si na mulandu, ipfa tshililo tshanga! Nḓevhe yau nga i thetshelese thabelo yanga, hufha mulomoni wanga hu si na vhufhura.

² Nga a vhe Iwe a nṱanzwaho mulandu, hufha u tshi ḓivha zwi re zwone.

³ Arali wa ṱola mbilu yanga, wa nndalela vhusiku, wa tou fhenḓa mbilu yanga, u ḓo wana ndi si na vhuvhi; na u amba thi ambi ḽivhi

⁴ ndi tshi vhona mishumo ya vhathu. Ndi tinya nḓila dza vhadzia-u-levha ndi tshi tevhedza zwe wa amba.

⁵ Ndo tou longondo nḓilani dzau, a thi vhuyi nda isa mulenzhe ḓakani.

U humbudza Mudzimu lufuno lwawe

⁶ Mudzimu, u a nnyaravha, ndi zwine nda u vhidzelela: tshingamisela nḓevhe yau kha nṋe u pfe zwine nda amba.

⁷ Vha khudaho nga Iwe musi vho vutshelwa nga maswina u vha tshidza nga tshanḓa tshau tsha maanḓa, ndi zwone, ntsumbedze lufuno lwau lu sa dzinginyei, lu kanukisaho.

⁸ Ntsireledze unga tshanga ya iṱo, nkuvhatedze nga phapha dzau,

⁹ uri vhavhi vha si nṱangule, maswina o nndanganaho a si ntinge.

U halifha ha maswina

¹⁰ Mbilu dzavho dzo fura tshiṱuhu, a si one mazuwo a bvaho milomoni yavho.

¹¹ Vha ntsala murahu hoṱhe hune nda ya, vho nndalela uri vha ntekule.

¹² Vha tou nga ndau yo lindela u ponda, vha nga ndau ya nduna yo lalela tshiṱakani.

Mudzimu Mulamuleli

¹³ Takuwa Muṋe washu, u imedzane na vhavhi, vha fhedze nga banga ḽau u ntshidze!

¹⁴ Ndi vhathu vha shango havha, a vha shayi tshithu vhutshiloni vhuno, vha tshi nndevhela u ntshidze. Vha zwimbedze nga zwe wa dzula wo vha khokhela, zwi rathele na kha vhana vhavho, zwi salaho zwi wele vhaḓuhulu.

¹⁵ Hone nṋe ndi a fulufhedzea, ndi ḓo vhona tshifhaṱuwo tshau, ndi tshi vuwa ndi ḓo u vhona ro livhana zwifhaṱuwo nda pfa ndo fushea.