DZIPHISALEMA 148 - BIVHILI KHETHWA Mafhungo Madifha

Tsiko yoṱhe nga i rende Muṋe washu Thendo dza vha ṱaḓulu

¹ Haleluya, nga hu rendwe Muṋe washu! Rendani Muṋe washu ni makoleni, mu rendeni ngeo ṱaḓulu!

² Mu rendeni, inwi vharuṅwa vhawe noṱhe, mu rendeni, inwi mara awe noṱhe!

³ Ḓuvha na ṅwedzi, mu rendeni, mu rendeni noṱhe, inwi ṋaledzi dzi penyaho!

⁴ Mu rendeni, inwi maṱaḓulu a ṱaḓulu-ṱaḓulu, na inwi maḓi a re nṱha ha lutombo!

⁵ Zwoṱhe nga zwi rende dzina ḽa Muṋe washu; Ene o amba, zwa vha hone!

⁶ O zwi imisa vhudzuloni hazwo lini na lini, a zwi vhetshela mulayo u sa pfukwi.

Thendo dza vha fhano fhasi

⁷ Zwi re fhano fhasi nga zwi rende Muṋe washu, na inwi mabuka a lwanzhe, na inwi mativha,

⁸ na mulilo, na tshifhango, na mahaḓa, na khuli, na maḓumbu, a khunyeledza zwe a amba.

⁹ Dzithavha na zwikwara zwoṱhe nga zwi mu rende, na miri ya mitshelo, na maṱaka oṱhe,

¹⁰ na phukha dza ḓaka, na zwifuwo zwoṱhe, na zwikokovhi, na zwiṋoni,

¹¹ khathihi na mahosi, na tshakha dzoṱhe, na vhakololo, na vhavhusi vhoṱhe vha shango,

¹² na vhaṱhannga, na vhasidzana, na vhakalaha, na vhana!

¹³ Vhoṱhe nga vha rende dzina ḽa Muṋe washu, dzina ḽawe ndi ḽihulu ḽi ḽoṱhe, vhugala hawe vhu alama ḽifhasi na ḽiṱaḓulu!

¹⁴ U dzula o kuvhatedza vhathu vha Israele, o vha ombela shambo, uri vhalanda vhawe vha fulufhedzeaho vha mu rende. Haleluya, nga hu rendwe Muṋe washu!