DZIPHISALEMA 147 - BIVHILI KHETHWA Mafhungo Madifha

U renda Mudzimu Musiki na Mutshidzi Muṋe washu Muvhofhololi

¹ Haleluya, nga hu rendwe Muṋe washu! Ndi zwavhuḓi hani u renda Mudzimu washu nga nyimbo! Zwi takadza hani! O tewa nga thendo.

² Muṋe washu u fhaṱa Jerusalema; u kuvhanganya Vhaisraele vho balanganaho.

³ U fhodza vha mbilu dzi vhavhaho, a pomba mbonzhe dzavho.

⁴ U vhea tshivhalo tsha ṋaledzi, iṅwe na iṅwe a i rina dzina.

⁵ Muṋe washu ndi muhulwane, maanḓa awe ha konei, ṱhalukanyo yawe a i gumi.

⁶ Muṋe washu u vusa vho kandekanywaho, vhavhi vhone u vha posa fhasi.

Muṋe washu Mulondoli

⁷ Livhuhani Muṋe washu nga nyimbo; Mudzimu washu mu rendeni nga mbila.

⁸ U pila lutombo nga makole, ḽifhasi a ḽi nisela mvula, mivhunduni a medza hatsi.

⁹ U ṋea dziphukha zwiḽiwa zwadzo, na mafhondo a mahunguvhu a tshi lila.

¹⁰ Maanḓa a bere a si one ane a mu takadza, na vhuhali ha vhahali a si hone vhune a vhu takalela;

¹¹ Muṋe washu u takadzwa nga vhane vha mu ofha, vhane vha fulufhela lufuno lwawe lu sa dzinginyei.

Muṋe washu Muvhei wa mulayo

¹² Iwe Jerusalema, renda Muṋe washu, iwe Tsioni, renda Mudzimu wau!

¹³ Ndi Ene a no khwaṱhisa tswinga dzau, a shudufhadza vhana vhau.

¹⁴ U ladza shango masakhani au, a u fusha nga mavhele avhuḓi.

¹⁵ U vhetshela ḽifhasi mulayo; zwine a amba zwi mbo ḓi itea.

¹⁶ U nisa gabugu ya tshena unga muḓali, a hashekanya mahaḓa a nga milora,

¹⁷ a nisa tshifhango tsha nga thombwana; ndi nnyi ane a nga konḓelela phepho yawe?

¹⁸ A dovha a tou amba fhedzi zwa mbo ḓi ṋoka, a fhungisa mimuya yawe ha ela maḓi.

¹⁹ O dzumbululela Jakopo ipfi ḽawe, a ḓivhadza Israele pfanelo dze a vhofha.

²⁰ Hezwo ha athu zwi itela dziṅwe tshakha, dzone a dzi ḓivhi milayo yawe. Haleluya, nga hu rendwe Muṋe washu!