DZIPHISALEMA 146 - BIVHILI KHETHWA Mafhungo Madifha

Mudzimu Musikazwoṱhe a fulufhedzeaho Thendo vhutshilo hoṱhe

¹ Haleluya, nga hu rendwe Muṋe washu! Kha ndi rende Muṋe washu.

² Ndi ḓo renda Muṋe washu ndi tshi kha ḓi tshila; ndi ḓo renda Mudzimu nga nyimbo ndi tshi kha ḓi vha hone.

U sa fulufhedzea ha muthu

³ U songo fulufhela vhavhusi, ndi vhathu zwavho, a vha tshidzi;

⁴ muya wavho u tshi pfuluwa vha humela mavuni, ha mbo ḓi vha u pfuvha ha maano avho.

Vhuhulu ha Muṋe washu na vhuthu hawe

⁵ Wa mashudu ndi uyo a no ḓitika nga Mudzimu wa Jakopo, a lavhelela Muṋe washu Mudzimu wawe,

⁶ o sikaho ḽiṱaḓulu na ḽifhasi, na lwanzhe na zwoṱhe zwi re khazwo; u fulufhedzea hawe a hu shanduki.

⁷ U sengela vho kandeledzwaho, vha na nḓala a vha fusha; Muṋe washu u vhofholola zwivhoxwa.

⁸ Muṋe washu u bonyolosa mabofu, Muṋe washu u vusa vho waho, Muṋe washu u funa vha fulufhedzeaho,

⁹ Muṋe washu u londola dziṱhunḓu, u tika tshilikadzi na tsiwana, nḓila dza vhavhi dzone u a dzi piringanya.

Muvhuso u sa gumi

¹⁰ Muṋe washu u ḓo vhusa lini na lini, Mudzimu wau, iwe Tsioni, ndi wa mirafho yoṱhe. Haleluya, nga hu rendwe Muṋe washu!